آئی پی ایل کی پہلی اننگز نے میری زندگی بدل دی:میک کولم

کولکتہ/ انڈین پریمیئر لیگ (آئی پی ایل) کے پہلے ایڈیشن کے پہلے میچ میں کولکاتا نائٹ رائڈرس ( کے کے آر ) کی جانب سے کھیلتے ہوئے دھماکہ خیز اننگز کھیلنے والے نیوزی لینڈ کے اوپنر برینڈن میک کولم نے کہا ہے کہ اس اننگز نے ان کی زندگی بدل دی۔میک کولم نے 2008 میں رائل چیلنجر بنگلور (آرسی بی) کے خلاف کھیلے گئے میچ میں 73 گیندوں میں 10 چوکوں اور 13 چھکوں کی مدد سے ناقابل شکست 158 رنز بنائے تھے جس کی بدولت کولکتہ نے بنگلور کو 140 رنز سے شکست دی تھی۔میک کولم نے کہا کہ میں بہت خوش تھا کہ مجھے یہ موقع ملا۔ آپ کے کیریئر میں اتار چڑھاو آتے رہتے ہیں لیکن اس رات نے میری زندگی بدل کر رکھ دی۔ اس تین گھنٹے کو میں کبھی نہیں بھول سکتا۔ انہوں نے کہا کہ مجھے یہ موقع کیوں ملا کہ میں سورو گنگولی کے ساتھ اوپننگ کرنے اترا۔ مجھے پہلے میچ میں کھیلنے کا موقع کیسے ملا۔ میں نے کس طرح اس موقع سے استفادہ کیا۔ سچ بتاؤں تو مجھے ان سوالات کے جواب نہیں معلوم لیکن میں اتنا جانتا ہوں کہ اس نے میری زندگی تبدیل کر دی۔ میک کولم نے کہا کہ میں نے اپنے خاندان کی بھی زندگی ہمیشہ کے لئے بدل دی اور میں اپنے آپ کو بہت خوش قسمت سمجھتا ہوں۔ میں نے اس دن جو کیا ایسا میں کبھی کر پاؤں گا اس بارے میں نہیں سوچا تھا۔ لیکن یہ بھی سچ ہے کہ میں اپنے ٹیم کے ساتھیوں کے بغیر یہ نہیں کر پاتا۔ یہ ایسا پل ہے جب آپ اس بارے میں سوچتے ہیں تو لگتا ہے کہ آپ کتنے خوش قسمت ہیں۔ کے کے آر کے چیف کوچ مقرر ہوئے میک کولم نے اس دن کو یاد کرتے ہوئے بتایا کہ انہیں اب بھی اس وقت کے کپتان سورو گنگولی کی بات یاد ہے جو انہوں نے میک کولم سے کہی تھی۔میک کولم نے کہا کہ مجھے پوری بات یاد نہیں لیکن اتنا یاد ہے جو دادانے مجھے کہا تھا۔ انہوں نے مجھے کہا تھا کہ تمہاری زندگی ہمیشہ کے لئے بدل جائے گی لیکن اس وقت میں یہ نہیں سمجھ پایا تھا۔ اگرچہ میں ان سے 100 فیصد متفق ہوں۔ ٹیم مالک شاہ رخ خان نے بھی مجھ سے کہا تھا کہ تم ہمیشہ نائٹ رائڈرس کے ساتھ رہو گے ۔ انہوں نے کہا کہ میں اپنے کیریئر میں اتنا بے چین کبھی نہیں ہوا لیکن اس دن میں کافی بے چین تھا۔ میرے خیال سے ہم لوگوں میں سے کسی کو نہیں پتہ تھا کہ یہ ٹورنامنٹ کیسا ہوگا۔ لیکن ہمیں یہ منصوبہ بندی پسند آئی تھی اور بنگلور میں جو ہوا وہ یادگار لمحہ تھا۔ میک کولم نے کہا کہ ایک وقت تھا جب میں کے کے آر کے ساتھ تھا لیکن اس کے بعد مجھے ریلیزکر دیا گیا۔ اگرچہ میرا ٹیم کے ساتھ رشتہ ہمیشہ اچھا رہا۔ میں فرنچائزز کا مجھے موقع دینے کے لئے ہمیشہ شکر گزار رہوں گا۔ میرے پاس جب کوچ بننے کی تجویز آئی تو میں نے اس بارے میں غور کیا۔ مجھ شاہ رخ نے بھی کہا تھا کہ تم ہمیشہ کے کے آر کا حصہ رہو گے ۔ میرے خیال سے یہ بھی ایک موقع ہے ۔ میک کولم نے کہا کہ کے کے آر میں تمام لوگ اچھے ہیں اور میں امید کرتا ہوں کہ ہم میدان پر کامیاب ہوں گے ۔ ہم بنگال کے لوگوں، شاہ رخ اور فرنچائزز سے جڑے دوسرے لوگوں کی توقع تک پہنچنے کی کوشش کریں گے ۔