عظمیٰ نیوز سروس
نئی دہلی// حکومت نے سنیچر کو میڈیا چینلوں اور سوشل میڈیا پلیٹ فارمز کو ایک ایڈوائزری جاری کرتے ہوئے انہیں خبردار کیا کہ وہ ایودھیا میں 22 جنوری کو ہونے والے رام مندر کے پروگرام سے متعلق کسی بھی غلط کو مواد شائع نہ کریں۔ وزارت اطلاعات و نشریات کی طرف سے جاری کردہ ایڈوائزری میں کہا گیا ہے کہ کچھ غیر تصدیق شدہ، اشتعال انگیز اور جعلی پیغامات پھیلائے جا رہے ہیں، خاص طور پر سوشل میڈیا پر، جو فرقہ وارانہ ہم آہنگی اور امن عامہ کو خراب کر سکتے ہیں۔ایودھیا میں بھگوان رام کی مورتی کی تقدیس کی تقریب 22 جنوری کو وزیر اعظم نریندر مودی اور کئی دیگر معززین کے ساتھ منعقد ہوگی۔ ایڈوائزری میں اخبارات، نجی سیٹلائٹ ٹی وی چینلز اور ڈیجیٹل میڈیا پر خبروں اور حالات حاضرہ کے پبلشرز سے کہا گیا ہے کہ وہ کسی بھی ایسے مواد کو شائع اور ٹیلی کاسٹ کرنے سے گریز کریں جو غلط یا ملک میں فرقہ وارانہ ہم آہنگی یا امن عامہ کو خراب کرنے کی صلاحیت رکھتا ہو۔ایڈوائزری میں کہا گیا ہے، “مزید برآں، اپنی مستعدی کی ذمہ داریوں کے حصے کے طور پر، سوشل میڈیا پلیٹ فارمز کو مشورہ دیا جاتا ہے کہ وہ مذکورہ نوعیت کی معلومات، نمائش یا شائع نہ کرنے کے لیے معقول کوشش کریں‘‘۔
