عظمیٰ نیوز سروس
جموں//شمسی توانائی کے ذریعے 300 میگاواٹ بجلی پیدا کرنے کیلئے 2025 تک تقریباً 20 ہزارسرکاری عمارتوں میں شمسی چھتوں کے منصوبے لگائے جائیں گے۔سرکاری ذرائع نے پیر کو بتایا کہ جموں و کشمیر کے سرکاری محکموں کو شمسی توانائی کے ذریعے بجلی کی فراہمی ہوگی کیونکہ حکومت نے 2025 تک 300 میگاواٹ بجلی پیدا کرنے کا ہدف مقرر کیا ہے۔سرکاری ذرائع نے بتایا، “جموں و کشمیر انرجی ڈیولپمنٹ ایجنسی (کی طرف سے 20,000 سرکاری عمارتوں کی چھتوں پر شمسی منصوبے لگائے جائیں گے۔”انہوں نے انکشاف کیا کہ اب تک 1900 سرکاری عمارتوں پر چھتوں پر شمسی توانائی کے منصوبوں کی تنصیب سے 27.61 میگاواٹ بجلی پیدا کی جا رہی ہے۔
انہوں نے کہا کہ “یہ منصوبے JAKEDA اور دیگر متعلقہ محکموں کی مدد سے قائم کیے گئے ہیں” ۔انہوں نے مزید کہا کہ حکومت سے متعلقہ اداروں کا لوڈ تقریباً 600 میگاواٹ ہے۔انہوں نے کہا کہ JPDCL کے ساتھ لگ بھگ 4000 میگاواٹ لوڈ میں سے، ہسپتالوں، سکولوں، کالجوں، یونیورسٹیوں، دفاعی اداروں اور سٹریٹ لائٹس کے علاوہ 22,494 رجسٹرڈ سرکاری دفاتر سمیت حکومت سے متعلقہ اداروں کا لوڈ تقریباً 600 میگاواٹ ہے۔انہوں نے مزید کہا”تقریباً 15 فیصد توانائی سرکاری ادارے استعمال کرتے ہیں، جس کا سالانہ تخمینہ 3000 ملین یونٹ بجلی ہے اور اگر صرف 50 فیصد توانائی کی ضروریات چھتوں کے شمسی منصوبوں کے ذریعے پوری کی جاتی ہیں، تو جموں و کشمیر حکومت ہر سال تقریباً 700 کروڑ روپے کی بچت کرے گی “۔سرکاری ذرائع نے بتایا کہ کشمیر یونیورسٹی، نیشنل انسٹی ٹیوٹ آف ٹیکنالوجی اوریونیورسٹی آف ایگریکلچرل سائنسز اینڈ ٹکنالوجی جیسے تعلیمی اداروں کی بجلی کی کھپت سے مالی بوجھ بھی کم ہو جائے گا جو شمسی توانائی کے ذریعے بجلی پیدا کرنے کی بہتر صلاحیت رکھتے ہیں۔انہوں نے کہا کہ “سرکاری محکموں میں بجلی کی کھپت کو کم کرنے سے بجلی کے بڑھتے ہوئے بوجھ سے راحت ملے گی۔”سرکاری ذرائع نے بتایا کہ “مختلف سرکاری محکموں کے بقایا جات کروڑوں کے ہیں، جو ایک اسکیم کے تحت معاف کیے گئے تھے، لیکن پھر بھی کئی سرکاری محکمے اپنے ماہانہ بجلی کے بل جمع نہیں کر رہے ہیں” ۔
