عظمیٰ نیوز سروس
جموں// ملی ٹینٹوں کے خلاف فیصلہ کن کارروائی کرتے ہوئے، این آئی اے ایکٹ کے تحت، جموں کی نامزد خصوصی عدالت نے پلوامہ ضلع کی تحصیل کاکہ پورہ کے ہکری پورہ گائوںمیں ایک رہائشی مکان کو ضبط کرنے کا حکم دیا ہے ۔ حکم میں کہا گیا ہے کہ اس احاطے کو ایک ٹھکانے اور منصوبہ بندی کے طور پر استعمال کیا جا رہا تھا، جس کے پیچھے جیش محمد شامل تھے۔ عدالت نے UAPA کی دفعہ 25-26 کے تحت جائیداد کو ” ملی ٹینسی کی آمدنی” قرار دیا اور کسی بھی قسم کی منتقلی یا تیسرے فریق کے مفاد پر پابندی لگا دی۔ پریذائیڈنگ جج سندیپ گنڈوترا (ایڈیشنل سیشن جج)این آئی اے خصوصی جج نے این آئی اے کے چیف تفتیشی افسرراجیو اوم پرکاش پانڈے کی طرف سے داخل کی گئی درخواست کی اجازت دی، جس میں ملزم کی بیوی کی 9.5 مرلہ رہائشی مکان(خسرہ نمبر 492 ) کو ضبط کرنے کی درخواست کی گئی تھی۔تفتیش کاروں نے ثابت کیا کہ جیش محمد سے وابستہ محمد عمر فاروق، سمیر احمد ڈار اور عادل احمد ڈار نے قافلے پر بم دھماکے سے پہلے اور بعد میں ہکری پورہ کے گھر کا استعمال کیا، گھر کے افراد نے مبینہ طور پر پناہ فراہم کی جس نے سازش کو آگے بڑھایا۔ عدالت نے اس بات پر زور دیا کہ UAPA کے تحت دہشت گردی کی سہولت فراہم کرنے کے لیے جائیداد کو ضبط کرنے کے لیے بنیادی ملزم کی ملکیت ضروری نہیں ہے۔
