عظمیٰ نیوز سروس
سرینگر// مرکزی سکریٹری، محکمہ اسکولی تعلیم اور خواندگی، سنجے کمار نے منگل کو جموں و کشمیر میں 11ویں جماعت کے بورڈ کے امتحانات کے انعقاد پر نظر ثانی کرنے کا مطالبہ کیا، اور مشورہ دیا کہ اس مشق کو ختم کیا جائے۔ایس کے آئی سی سی میں ایک جائزہ میٹنگ کی صدارت کرتے ہوئے کمار نے جموں و کشمیر بورڈ آف اسکول ایجوکیشن کو 11ویں جماعت کے بورڈ امتحانات کے انعقاد کی ضرورت کا دوبارہ جائزہ لینے کی ہدایت کی۔ انہوں نے اس بات پر زور دیا کہ اس طرح کے اقدامات طلبا کے لیے سیکھنے کے نتائج کو یقینی بنانے میں رکاوٹ نہیں بننا چاہیے۔میٹنگ کے دوران، مرکزی سکریٹری نے تمام سرکاری سکولوں میں معیاری تعلیم کی ضرورت پر بھی روشنی ڈالی، پیشہ ورانہ اور ہنر پر مبنی تعلیم کو نصاب کا حصہ بنانے پر زور دیا۔ انہوں نے سکول چھوڑنے کی شرح پر تشویش کا اظہار کیا اور عہدیداروں کو ہدایت کی کہ وہ اس بات کو یقینی بنائیں کہ کوئی بھی طالب علم 12ویں جماعت مکمل کرنے سے پہلے سکول نہ چھوڑے۔کمار نے پائیدار انفراسٹرکچر اپ گریڈ، مضبوط پری پرائمری تعلیم، اور کنڈرگارٹن کلاسوں میں بڑے پیمانے پر اندراج پر مزید زور دیا۔ انہوں نے اساتذہ کی تربیت، انسانی وسائل کے انتظام، اور سکول سے باہر بچوں کو مرکزی دھارے میں لانے کے لیے اسٹیک ہولڈرز سے مربوط کوششوں پر بھی زور دیا۔جائزہ میں سکول ایجوکیشن سیکرٹری رام نواس شرما، ڈائریکٹر جنرل سکول ایجوکیشن کشمیر جی این ایتو، ڈائریکٹر سکول ایجوکیشن جموں ڈاکٹر نسیم چودھری، اور سماگرا شکشا کے سربراہان سمیت سینئر افسران نے شرکت کی۔ میٹنگ میں جموں و کشمیر میں CBSE کے علاقائی دفتر کی تجویز، تمام کلاسوں میں NEP-2020 کے نصاب کو اپنانا، اساتذہ کی استعداد کار میں اضافہ، تشخیص، اور ڈیجیٹل مداخلتوں جیسے DIKSHA، VSK، اور PM e-VIDYA کو مضبوط کرنا شامل تھا۔مرکزی سکریٹری نے سماگرا شکشا، پی ایم شری، پرکھ، اور ڈائیٹ اور آئی ٹی ای پی اداروں کے کام کاج کے تحت پیش رفت کا بھی جائزہ لیا۔ انہوں نے ہدایت کی کہ سرکاری سکولوں کو پرائیویٹ اداروں کے معیار کے مطابق سیکھنے کا بنیادی مرکز بنایا جائے۔
