نیوز ڈیسک
جموں //لیفٹیننٹ گورنر منوج سنہا نے کہا کہ دُنیا کے عظیم ترین فوجی کمانڈروں میں ایک جنرل زوراور سنگھ نے اپنی بے مثال بہادری اور فوجی حکمت عملی سے ملک کا سر بلند کیا ، وہ آنے والی نسلوں کو ترغیب دیتے رہیں گے ۔ لیفٹیننٹ گورنر منوج سنہا، یوم جنرل زوراور سنگھ کی یاد میں منعقدہ تقریب میں شرکت کر رہے تھے ۔ اس موقعہ پر لیفٹیننٹ گورنر نے کہا کہ وہ ہندوستان کی طاقت اور خود اعتماد ی کا مجسمہ ہیں ۔ اُنہوں نے کہا کہ ان کی بہادری ، نظم و ضبط اور فرض کے تئیں لگن اس بات کی گواہی ہے کہ بہادر کیلئے کچھ بھی ناممکن نہیں ۔
لیفٹیننٹ گورنرنے مزید کہا کہ جنرل زوراور سنگھ نسلوں کیلئے ایک رول ماڈل ہیں کیونکہ ان کا نام مادر وطن کیلئے محبت ، عقیدت اور قربانی کا مضبوط احساس پیدا کرتا ہے ۔ اُنہوں نے کہا کہ تاریخ ہندوستان میں ان کے تعاون اور اہمیت کو پوری طرح پہچاننے کی ہماری اِجتماعی کوشش ہونی چاہیے ۔ اُنہوں نے کہا کہ مورّخین ، ادباء کو چاہیے کہ وہ حقیقی قومی ہیرو جنرل زوراور سنگھ کے تاریخی کارنامے پر توجہ دیں اور نئی نسل کو لداخ ، بلتستان ، تبت میں ان کی فوجی مہمات اور مہاراجہ گلاب سنگھ جی کے دور میں ڈوگرہ سلطنت کی توسیع میں بے پناہ شراکت کی یاد دلائی جائے ۔ لیفٹیننٹ گورنرنے جموں کشمیر کے تبدیلی کے سفر پر بھی بات کی ۔ اُنہوں نے کہا کہ جموں و کشمیر ایک سنہری دور کی طرف بڑھ رہا ہے ۔ جنرل زوراور سنگھ نے ایک مضبوط اور خوشحال جموں و کشمیر کا تصور کیا تھا جس میں ہر شہری عزت اور خود اعتمادی کی زندگی گزار سکے ۔ اُنہوںنے کہا کہ ہم ایک خوشحال اور جامع معاشرے کی تشکیل کے لئے پُرعزم ہیں ۔ لیفٹیننٹ گورنرنے عوام پر زور دیا کہ وہ ترقی کے عمل کو تیز کرنے کیلئے اپنی ذمہ داریاں اَدا کریں ۔ لیفٹیننٹ گورنر نے اس موقعہ پر مشہور مجسمہ ساز رویندر سنگھ جموال اور پاور لفٹر انمول بھردواج کوعزاز سے نوازا۔
