سرینگر// حریت(گ) سید علی گیلانی نے امریکہ اور بھارت کی مخالفت کے باوجود پاکستان کے ’’یو این انسانی حقوق کونسل‘‘ کارُکن منتخب ہونے پر حکومت پاکستان اور اہلیان پاکستان کو مبارکباد دیتے ہوئے کہا کہ امریکہ اور بھارت کی مخالفت کے باوجود 151ممالک کا پاکستان انسانی حقوق کے حوالے سے نمائندگی کرنے پر اعتماد کا اظہار جہاں قابل مسرت ہے، وہیں اب پاکستان کی ذمہ داری بنتی ہے کہ وہ دنیا میں جہاں کہیں بھی انسانی حقوق کی پامالیاں ہورہی ہوں، اس پر دنیا کی توجہ نہ صرف مبذول کرائیں، بلکہ نوع انسانیت میں انسانی قدروں کو بحال کرانے میں اپنا موثر کردار ادا کریں۔ گیلانی نے کہا کہ ہم اس دین سے تعلق رکھتے ہیں، جس کی یہ تعلیم ہے جس نے کسی ایک انسان کو بچایا گویا اس نے پوری انسانیت کو بچایا۔ اسی جذبہ کے تحت پاکستان اور دیگر انسانی حقوق کے علمبرداروں کو دنیا کے تمام مظلوموں کو بچانے کی عملی تدابیر کرنی چاہیے۔ دنیا میں جہاں کہیں بھی انسانوں پر ظلم ہورہا ہو، ہمیں رنگ، نسل، ذات پات اور قوم ووطن کے امتیاز کے بجائے انسان کو صرف انسان کی نظر سے دیکھ کر مظلوم کی حمایت کرنی چاہیے اور ظالم کتنا بھی جابر وقاہر ہو اس کے سامنے حق گوئی سے ہمیں آنکھیں نہیں چرانی چاہیے، چاہے اس کی طرف سے ہمیں دنیاوی مفادات ومراعات مل رہے ہوں یا عذاب وعتاب، چاہے کوئی راضی رہے یا ناراض ہو۔ بزرگ آزادی پسند راہنما نے کہا ہمیں امید ہے کہ اب جہاں دنیا کے تمام مظلوموں کے انسانی حقوق کے لیے پاکستان آواز بلند کرتا رہے گا وہیں سرزمین جموں کشمیر پر جاری ظلم وبربریت کے نتیجے میں جموں کشمیر کے چپہ چپہ پر ہورہی انسانی حقوق کی بے شمار پامالیوں کو اُجاگر کرنے میں پاکستان اپنا مؤثر کردار ادا کرکے مظلوم کشمیریوں کے لیے محسنانہ رول نبھائے گا۔
یو این انسانی حقوق کونسل میں پاکستان کی شمولیت باعث مبارک:گیلانی
