عظمیٰ نیوزسروس
جموں//موجودہ موسمی صورتحال اور تازہ بارشوں کے باعث یاتریوں کی حفاظت کو مد نظر رکھتے ہوئے جموں کے ریاسی ضلع میں تریکوٹہ پہاڑیوں میں ویشنو دیوی مندر کی درشن اتوار کو 13ویں دن بھی معطل رہی ۔ حکام کے مطابق موسم میں اگرچہ بہتری آئی تھی تاہم اتوار کو تازہ بارشویں ہوئی جس کے بعد یاتریوں کی حفاظت کو دیکھتے ہوئے مسلسل 13ویں دن ویشنو دیوی یاترا معطل رہی۔انہوں نے کہا کہ ملک کے دوسرے حصوں سے بہت سے یاتری اب بھی کٹرا میں ٹھہرے ہوئے ہیں اور امید ہے کہ یاترا جلد ہی دوبارہ شروع ہو جائے گی اور وہ درشن حاصل کر سکیں گے۔حکام نے بتایا کہ یاترا گزشتہ ہفتے کے شروع میں شدید بارش اور مندر کی طرف جانے والی پٹریوں کے ساتھ مٹی کے تودے گرنے کی وجہ سے روک دی گئی تھی۔ انہوں نے کہا کہ کچھ کلیئرنس آپریشنز کے باوجود خراب موسم نے یاتریوں کیلئے راستے کو غیر محفوظ بنا دیا ہے، جس سے حکام کو معطلی جاری رکھنے پر مجبور ہونا پڑا۔ہزاروں یاتری جو یاترا کی امید کے ساتھ کٹرا پہنچے تھے انہیں موسم کے بہتر ہونے تک انتظار کرنے کو کہا گیا ہے۔ شرائن بورڈ کے ایک عہدیدار نے بتایا کہ بورڈ نے پھنسے ہوئے یاتریوں کیلئے انتظامات کیے ہیں اور انتظامیہ اور پولیس کے ساتھ تال میل کے ساتھ صورتحال پر گہری نظر رکھے ہوئے ہے۔ حکام کا کہنا ہے کہ حفاظت اولین ترجیح ہے۔
