عظمیٰ نیوز سروس
سرینگر// جموں و کشمیر کے وزیر اعلیٰ عمر عبداللہ نے ہفتے کے روز وزیر اعظم نریندر مودی کی امرناتھ یاتریوں سے اپنے سفری بجٹ کا کم از کم 10 فیصد مقامی مصنوعات پر خرچ کرنے کی اپیل کا خیرمقدم کرتے ہوئے کہا کہ اگر عقیدت مندوں کو مقامی بازاروں میں آزادانہ طور پر جانے کی اجازت دی جائے تو اس اقدام سے کشمیر کی معیشت کو کافی فائدہ پہنچ سکتا ہے۔
صحافیوں سے بات کرتے ہوئے عبداللہ نے وزیر اعظم کی کال کو “بہت اچھی تجویز” قرار دیا لیکن کہا کہ اس کی کامیابی کا انحصار یاتریوں کو اپنی بسوں سے باہر نکلنے اور مقامی کاروبار سے بات چیت کرنے کی آزادی دینے پر ہے۔انہوں نے کہا”یہ بہت اچھا بیان ہے، لیکن انہیں اپنی بسیں چھوڑ کر ادھر ادھر جانے کی اجازت ہونی چاہیے، ورنہ وہ کیسے گزارہ کریں گے؟ انہیں قیدیوں کی طرح بسوں کے اندر رکھا جا رہا ہے اور انہیں کہیں جانے کی اجازت نہیں ہے، انہیں تھوڑی سی تلاش کرنے دیں تاکہ وہ اپنے بجٹ کا 10 فیصد یہاں خرچ کر سکیں۔ اس سے ہمارے لوگوں کو فائدہ ہو گا،” ۔وزیر اعلیٰ نے کہا کہ یاتریوں کو بازاروں میں جانے کی اجازت دینے سے مقامی دکانداروں، کاریگروں، ٹٹو آپریٹرز، پورٹرز اور دیگر چھوٹے کاروباروں کو مدد ملے گی جو اپنی روزی روٹی کے لیے سالانہ امرناتھ یاترا پر انحصار کرتے ہیں۔
