ہندوستان اور ملیشیا صدیوں سے ایک دوسرے سے جڑے ہیں:مودی | اعلیٰ ٹیکنالوجی کے شعبوں میں تعاون بڑھانے کا فیصلہ

یو این آئی

نئی دہلی// ہندوستان اور ملیشیا نے منگل کو اپنی توسیع شدہ اسٹریٹجک ساجھے داری کو ایک جامع اسٹریٹجک اشتراک میں اپ گریڈ کرنے اور سیمی کنڈکٹر، فن ٹیک، دفاعی صنعت، اے آئی اور کوانٹم ٹیکنالوجی جیسے اعلی ٹیکنالوجی کے شعبوں میں تعاون کو بڑھانے کا فیصلہ کیا ہے ۔وزیر اعظم نریندر مودی اور ملیشیا کے وزیر اعظم انور ابراہیم کے درمیان منگل کو یہاں حیدرآباد ہاؤس میں دو طرفہ سربراہی اجلاس میں یہ فیصلہ کیا گیا۔ دونوں ملکوں نے سیاحت، تاریخی وراثت کے تحفظ، مواصلات، مالیاتی ٹیکنالوجی وغیرہ سمیت آٹھ مفاہمت ناموں پر دستخط کئے اور انڈیا ملیشیا کے سی ای او رپورٹ کو منظوری دی۔میٹنگ کے بعد اپنے پریس بیان میں مودی نے ابراہیم کو ان کے ہندوستان کے پہلے دورے پر خوش آمدید کہتے ہوئے کہا ’’میری تیسری میعاد کے آغاز میں ہندوستان میں آپ کا استقبال کرنے کا موقع ملنے پر مجھے خوشی ہے‘‘۔انہوں نے کہا کہ ہندوستان اور ملیشیا توسیع شدہ اسٹریٹجک شراکت داری کی ایک دہائی مکمل کر رہے ہیں اور پچھلے دو برسوں میں مسٹر ابراہیم کی حمایت نے ہماری ساجھے داری میں نئی رفتار اور توانائی بخشی ہے۔ مودی نے کہا کہ ہندوستان اور ملیشیا صدیوں سے ایک دوسرے سے جڑے ہوئے ہیں۔ ملیشیا میں مقیم تقریباً 30 لاکھ ہندوستانی تارکین وطن ہمارے درمیان ایک زندہ پل کی حیثیت رکھتے ہیں ۔ ہندوستانی موسیقی، کھانے اور تہواروں سے لے کر ملیشیا کے تورانہ گیٹ تک، ہمارے لوگوں نے اس دوستی کو پسند کیا ہے۔ ملیشیا آسیان اور ہند-بحرالکاہل خطے میں ہندوستان کا ایک اہم ساجھید ار ہے۔ ہندوستان آسیان کی مرکزیت کو ترجیح دیتا ہے۔ ہم اس بات سے اتفاق کرتے ہیں کہ ہندوستان اور آسیان کے درمیان آزادانہ تجارت کے معاہدے کا جائزہ بروقت مکمل ہونا چاہیے۔ مودی نے کہا کہ گزشتہ برسوں میں ملیشیا نے ہندوستان میں پانچ بلین ڈالر تک کی سرمایہ کاری کی ہے۔ انہوں نے کہا “آج ہم نے فیصلہ کیا ہے کہ ہم اپنے تعاون کو ‘جامع اسٹریٹجک پارٹنرشپ’ کی سطح تک اپ گریڈ کریں گے۔