شوکت حمید
سرینگر//جموں و کشمیر میں گزشتہ دو سالوں میں گھریلو تشدد کے 2,800 سے زیادہ واقعات درج ہوئے ہیں، گزشتہ مالی سال میں رپورٹ ہونے والے واقعات میں 121 فیصد اضافہ ہوا ہے۔ قانون ساز اسمبلی میں کل نیشنل کانفرنس کی رکن شمیمہ فردوس کے ایک سوال کے جواب میں سماجی بہبود کی وزیر سکینہ ایتو نے کہا کہ مالی سال 2023-24 کے دوران 893 کیس جبکہ 2024-25 کے دوران 1979 کیس درج ہوئے۔عداد و شمار کے مطابق، 2023-24 کے مقابلے میں گزشتہ مالی سال میں گھریلو تشدد کے 1,086 اضافی کیس رجسٹر کیے گئے۔حکومت نے کہا کہ خواتین کے لیے ون اسٹاپ سینٹرز، جو ’سخی‘ سینٹرز کے نام سے مشہور ہیں، مشن شکتی کے ڈائریکٹوریٹ کے تحت کام کر رہے ہیں۔ یہ مراکز پورے جموں و کشمیر میں 2018 سے کام کر رہے ہیں، جو مصیبت میں گھری خواتین کو طبی امداد، نفسیاتی مشاورت، قانونی امداد، عارضی پناہ گاہ اور پولیس کی مدد فراہم کر رہے ہیں۔وزیر نے کہا کہ یہ مراکز فی الحال ٹول فری نمبر 181 خواتین ہیلپ لائن سروس اور 112 ایمرجنسی رسپانس سپورٹ سسٹم (ERSS) کے ساتھ مربوط ہیں ، جو خواتین کو بغیر کسی رکاوٹ کے ہم آہنگی اور خدمات فراہم کرتے ہیں۔حکومت نے کہا کہ یہ مراکز نہ صرف گھریلو تشدد بلکہ سائبر ہراسانی، جنسی ہراسانی اور دیگر صنفی جرائم کے متاثرین کو بھی سہولیات فراہم کر رہے ہیں۔‘
