گلمرگ اور پہلگام میں ہلکی برفباری

سرینگر// وادی میں قریب دو ہفتے قبل ہونے والی بھاری برف باری کے بعد موسمی صورتحال مسلسل دگرگوں ہے ۔ محکمہ موسمیات کی طرف سے برف و باراں کے ایک اور مرحلے کی پیش گوئی کے بیچ وادی کے سیاحتی مقامات گلمرگ اور پہلگام میں دوران شب تازہ برف باری ہوئی جبکہ میدانی علاقوں میں ہلکی بارشیں ہوئیں۔ متعلقہ محکمے کے ترجمان نے کہا کہ وادی میں اگلے چوبیس گھنٹوں کے دوران کہیں کہیں ہلکی بارشیں متوقع ہیں۔ انہوں نے کہا کہ مغربی ہوائوں کا وادی میں داخل ہونے کا امکان ہے جس کے نتیجے میں 6 اور 7 مارچ کو برف و باراں متوقع ہے ۔ انہوں نے کہا کہ وادی کے بالائی علاقوں کیساتھ ساتھ بالخصوص کپوارہ،بارہمولہ، بانڈی پورہ، بڈگام اور گاندربل کے بالائی علاقوں میں درمیانی درجے کی برف باری کا امکان ہے ۔ ان کا کہنا تھا کہ 8 مارچ سے موسم میں بہتری متوقع ہے ۔ ادھر مطلع ابر آلود رہنے سے وادی میں گلمرگ کے بغیر شبانہ درجہ حرارت نقطہ انجماد سے اوپر درج ہوا ۔ گرمائی دارلحکومت سرینگر، جہاں گذشتہ چوبیس گھنٹوں کے دوران 4.3 ملی میٹر بارش ریکارڈ ہوئی ، میں کم سے کم درجہ حرارت 4.8  ریکارڈ کیا گیا جو گذشتہ شب 4.6 تھا۔ سیاحتی مقام گلمرگ، جہاں دوران شب 10.2 سینٹی میٹر تازہ برف جمع ہوئی  ، میں کم سے کم درجہ حررات منفی3.4 ریکارڈ کیا گیا جو گذشتہ شب منفی4.4  تھا۔