یو این آئی
ممبئی /ویسٹ انڈیز کی ٹیم حالیہ دنوں میں کرکٹ میں جدوجہد کا شکار کیوں نظر آرہی ہے ، اس سلسلے میں کپتان روسٹن چیس نے لب کشائی کی ہے ۔ ہندوستان کے خلاف سیریز کا پہلا ٹیسٹ بری طرح ہارنے کے بعد ویسٹ انڈیز کی ٹیم کو کئی اطراف سے تنقید کا سامنا ہے ، اب ویسٹ انڈیز کے ٹیسٹ کپتان رسٹن چیس نے ناقص کارکردگی کا ذمہ دار کیریبین کرکٹ میں بنیادی ڈھانچے اور پیسوں کی کمی کو ٹھہرایا ہے۔ احمد آباد میں ویسٹ انڈیز کی ناقص کارکردگی کا اندازہ اس بات سے لگایا جاسکتا ہے کہ بیٹنگ کے دوران پہلی اور دوسری اننگز میں ٹیم نے بالترتیب 162 اور 146 رنز بنائے تھے ، اس ٹیسٹ میچ میں ویسٹ انڈیز کو اننگز اور 140 رنز کی ہزیمت کا سامنا کرنا پڑا تھا۔ روسٹن چیس نے اننگز کی شکست کے بعد میڈیا سے گفتگو میں کہا کہ “میرے خیال میں کیریبین میں ٹریننگ سہولیات اور سامان کے لحاظ سے سسٹم قدرے خراب ہے ۔” انھوں نے کہا کہ میں خراب پرفارمنس پر کوئی بہانہ نہیں بنا رہا یا اسے کسی چیز کے پیچھے چھپانے کی کوشش نہیں کر رہا لیکن میں یہ بھی یہ سمجھتا ہوں ہمارے کھلاڑیوں پر یہ ذمہ داری ہے کہ وہ رنز بنائیں اور وکٹیں حاصل کریں۔ ویسٹ انڈین کپتان نے کہا کہ میں یہ ضرور کہوں گا کہ ہاں کیریبین میں مالیاتی مسائل ہیں اور کھیل کو اس طرح سے مالی طور پر سپورٹ نہیں کی جارہا جس کی اسے ضروت ہے ۔ ہم اس سلسلے میں جدوجہد کررہے ہیں، اس لیے ہمیں جو بھی مدد مل سکتی ہے وہ مل جائے تو بہتر ہے ا ور مجھے امید ہے کہ ہمیں یہ تعاون مل جائے گا تاکہ ہم کرکٹ کے بنیادی ڈھانچے کو مضبوط کر سکیں۔” خیال رہے کہ ویسٹ انڈیز نے احمد آباد ٹیسٹ میں مجموعی طور پر دونوں اننگز میں 89.2 اوورز بیٹنگ کی تھی، ویسٹ انڈین بیٹرز فاسٹ اور اسپن دونوں کے خلاف کمزور دکھائی دے رہی تھے ، چیس نے اسے ویسٹ انڈیز میں موجود پچز کی نوعیت سے منسوب کیا تھا۔ آل راؤنڈر کا کہنا تھا کہ “کیریبین کی پچز بیٹرز کے لیے اتنی موافق نہیں ہیں، اس لیے لوگ زیادہ دیر تک بیٹنگ نہیں کرتے اور وہ بڑا اسکور نہیں بناتے ۔ خیال رہے کہ ہندوستان نے ویسٹ انڈیز کو نہایت آسان انداز میں ٹیسٹ میچ میں صرف تین دن شکست دی تھی، میزبان ٹیم کیریبین سائیڈ کو سیریز میں 2-0 سے کلین سوئپ کرنے کے لیے فیورٹ ہے جبکہ جولائی میں آسٹریلیا نے ویسٹ انڈیز کو انکے گھر میں 3-0 سے شکست دی تھی۔
