عظمیٰ نیوز سروس
سرینگر//وزیر اعلیٰ عمر عبداللہ نے ہفتہ کے روز کہا کہ ایشیا کپ میں آئندہ ہندوستان اور پاکستان کے تصادم کو ایک کثیر الجہتی ٹورنامنٹ کے طور پر دیکھا جانا چاہئے نہ کہ ایک دو طرفہ مقابلے کے طور پر، اس بات پر زور دیتے ہوئے کہ کھیلوں کو بار بار سیاست کا نقصان نہیں بننا چاہئے۔چنئی میں نامہ نگاروں سے بات کرتے ہوئے عمر عبداللہ نے کہا، “ہمارا مسئلہ ہمیشہ سے دوطرفہ میچوں کا رہا ہے، کبھی بھی کثیر جہتی ٹورنامنٹ کے ساتھ نہیں۔”انہوں نے کہا”یہ ایک بڑے مقابلے کا حصہ ہے، نہ کہ ہندوستان اور پاکستان کے درمیان دوطرفہ سیریز، اگر یہ ایک آغاز ہے اور معاملات مثبت سمت میں جاتے ہیں تو غلط کچھ نہیں ہے۔”انہوں نے مزید کہا، “کھیل اکثر سیاست کا شکار ہوتا ہے، خاص طور پر برصغیر میں کرکٹ۔ لیکن آپ حقائق کو نظر انداز نہیں کر سکتے۔ ملک کے میرے حصے( جموں و کشمیر) کو تین دہائیوں سے زیادہ مشکلات کا سامنا کرنا پڑا ہے، اور اس سال پہلگام میں جو کچھ ہوا وہ حقیقی خدشات ہیں جن کے ساتھ ہم رہتے ہیں، ان کو دور نہیں کیا جا سکتا۔”
