کولگام ضلع میں انتخابی مہم ختم, پولنگ کل

کولگام //اننت ناگ پارلیمانی حلقہ کیلئے تین مرحلوں پر مبنی اِنتخابات کے دوسرے مرحلے کیلئے ضلع کولگام میں انتخابی مہم سنیچر کی شام اختتام کو پہنچی۔ ضلع میں کل یعنی 29 اپریل کو پولنگ ہونے جارہی ہے۔پہلے مرحلے میں23اپریل کو اننت ناگ ضلع میں 13.63فیصد پولنگ ہوئی تھی، جبکہ بیشتر علاقوں میں لوگوں نے اپنی ناراضگی کا اظہار کر کے گھروں سے باہر نکلنے کو ترجیح نہیں دی۔تیسرے مرحلے میں شوپیان اور پلوامہ اضلاع میں ایک ساتھ 6مئی کو پولنگ کا انعقاد ہونے جارہا ہے۔ضلع کولگام میں 3.45 لاکھ سے زائد رائے دہندگان اپنے حق رائے دہی کا استعمال کررہے ہیں۔یہ ضلع چار اسمبلی حلقوں نور آباد، کولگام ، ہوم شالی بُگ اور دیو سر پر مبنی ہے ۔ ضلع میں ووٹروں کی کل تعداد 345,486 ہے جن میں 179,607مرد ، 164,604خواتین ، 1262سروس ووٹر(1254مرد اور08 خواتین ووٹر) اور 13خواجہ سرا ووٹر ہیں ۔الیکشن کمیشن نے اِنتخابات کے احسن انعقاد کے لئے ضلع میں 433پولنگ مراکز قائم کئے ہیں ۔ضلع کے تمام پولنگ مراکز کو انتہائی حساس اور حساس قرار دیا گیا ہے اور  تین دائروں والی سیکورٹی کا بندو بست کیا گیا ہے ۔جو اُمیدوار چنائو ی دوڑ میں ہیں اُن میں نیشنل کانفرنس کے حسنین مسعودی ، بی جے پی کے صوفی یوسف ، کانگریس کے غلام احمد میر، پی ڈی پی کی محبوبہ مفتی ،ینتھرس پارٹی کے نثار احمد وانی ، پیپلز کانفرنس کے چودھری ظفر علی ،مانو ادھیکار پارٹی کے سنجے کمار دھر ، پرگتی شیل سماج وادی پارٹی کے سریندر سنگھ اور آزاد اُمیدوار امتیاز احمد راتھر، رضوانہ صنم، ریاض احمد بٹ ، زبیر مسعودی ، شمس خواجہ ، علی محمد وانی ، غلام محمد وانی قیصر احمد شیخ ، منظور احمد خان اور مرزا سجاد حسین بیگ شامل ہیں ۔کولگام اسمبلی حلقے میں سب سے زیادہ 98,298ووٹر ہیں جبکہ نورآباد میں سب سے کم 77,171ووٹر ہیں ۔دیوسر اسمبلی حلقہ میں کل 91,288 ووٹر ہیںجبکہ ہوم شالی بُگ حلقے میں 78,669ووٹر ہیں۔اننت ناگ ضلع کے اننت ناگ پارلیمانی حلقے میں 23؍ اپریل کو تیسرے مرحلے کے تحت ووٹنگ ہوئی تھی۔یہ پارلیمانی حلقہ چار اضلاع اننت ناگ ، کولگام ، شوپیاں اور پلوامہ پر مبنی ہے ۔ووٹنگ صبح 7بجے سے سہ پہر 4بجے تک ہوگی۔