یو این آئی
لزبن/دنیا کے معروف فٹ بال کھلاڑی کرسٹیانو رونالڈو نے آخرکار اپنی دیرینہ ساتھی جارجینا روڈریگز سے منگنی کرلی۔پرتگال اور النصر کے لیجنڈ فٹبالر کرسٹیانو رونالڈو نے 9 سال کے طویل سفرِ محبت کے بعد اپنی ساتھی جارجینا روڈریگز سے منگنی کر لی ہے ۔ جارجینا نے انسٹاگرام پر ایک تصویر شیئر کرتے ہوئے اپنے مداحوں کو اس بارے میں آگاہ کیا۔ جارجینا نے اپنے ہاتھ اور رونالڈو کے ہاتھ کی تصویر شیئر کی اور کیپشن میں لکھا کہ ہاں میں تم سے پیار کرتی ہوں۔ اس زندگی میں اور ہر آنے والی زندگی میں۔ گزشتہ روز 31 سالہ جارجینا روڈریگز نے 40 سالہ کرسٹیانو رونالڈو کے ہمراہ ایک تصویر شیئر کی، جس میں ان کا ہاتھ رونالڈو کے ہاتھ پر رکھا ہوا ہے اور ان کی انگلی میں بڑی سی ہیرے کی انگوٹھی نمایاں ہے ۔یہ جوڑا 2016 میں میڈرڈ کے گُچی اسٹور میں ملاقات کے بعد سے ساتھ ہے ، جہاں جارجینا ملازمت کر رہی تھیں۔دونوں کی دو بیٹیاں ہیں، جب کہ روڈریگز رونالڈو کے دیگر تین بچوں کی پرورش میں بھی مدد کر رہی ہیں، 2022 میں دونوں کے نوزائیدہ جڑواں بچوں میں سے ایک لڑکے کا انتقال ہوگیا تھا۔ جارجینا روڈریگز کی منگنی کی انگوٹھی ایک دلکش اوول کٹ ہیرے پر مشتمل ہے جو ایک نفیس بینڈ پر جڑی ہوئی ہے ۔ہسپانوی میڈیا کے مطابق جیولری ماہرین کا اندازہ ہے کہ یہ پتھر 10 سے 15 قیراط وزنی ہے اور اس کی مالیت 10 سے 50 لاکھ ڈالر کے درمیان ہے ۔ بعض جیولری ماہرین کا یہ بھی کہنا ہے کہ یہ انگوٹھی 25 سے 30 قیراط وزنی ہے ، جب کہ مختلف ذرائع نے اس کی قیمت 20 لاکھ سے 50 لاکھ ڈالر کے درمیان بتائی ہے ، جو اس کی شفافیت اور ڈیزائن پر منحصر ہے ۔ ریال میڈرڈ اور مانچسٹر یونائیٹڈ کے سابق اسٹار اس وقت سعودی عرب کے کلب النصر کے لیے کھیل رہے ہیں۔ انہوں نے حال ہی میں سعودی کلب کے ساتھ دو سال کی مدت کے لیے 2027 کی گرمیوں تک معاہدے میں توسیع کی ہے ۔ خیال رہے کہ کرسٹیانو رونالڈو اور ان کی گرل فرینڈ جارجینا 2016ء سے ایک ساتھ ہیں اور ان دونوں کی 2بیٹیاں جن میں 7سالہ عالیانہ اور 2سالہ بیلا بھی ہیں جبکہ رونالڈو کے مجموعی طور پر 5بچے ہیں۔کرسٹیانو رونالڈو کے ہاں 2010ء میں جس بیٹے کی پیدائش ہوئی تھی، اس کا نام انہوں نے ’’کرسٹیانو رونالڈو جونیئر‘‘رکھا ہے ۔ فٹ بالر نے اپنے پہلے بیٹے کی والدہ سے متعلق تاحال کبھی بھی واضح اعلان نہیں کیا، تاہم وہ اس حوالے سے متعدد بار بات کر چکے ہیں کہ ان کے بیٹے کو والدہ سے متعلق تمام تفصیلات کا علم ہے ۔بعدازاں ان کے یہاں جون 2017ء میں سروگیسی کے ذریعے جڑواں بچوں کی پیدائش ہوئی تھی۔ فٹ بالر نے اس وقت تصدیق کی تھی کہ ان کے ہاں جڑواں بچوں کی پیدائش ہوئی ہے ، تاہم انہوں نے اس حوالے سے مزید کوئی وضاحت نہیں کی تھی لیکن اعتراف کیا تھا کہ ان کے ہاں بیٹا اور بیٹی سروگیسی کے ذریعے ہوئے ۔
