عشرت حسین بٹ
منڈی // چیف میڈیکل آفیسر (سی ایم او) پونچھ ڈاکٹر پرویز احمد خان نے موسم سرما کی تیاریوں کو یقینی بنانے اور صحت کی سہولیات کو مزید فعال بنانے کے لئے اتوار کے روز پونچھ کے مختلف برف زدہ علاقوں کے صحت مراکز کا دورہ کیا۔ یہ اقدام ڈپٹی کمشنر پونچھ وکاس کنڈل آئی اے ایس کی ہدایت اور ڈائریکٹر ہیلتھ سروسز جموں ڈاکٹر راکیش منگوترا کی نگرانی میں انجام دیا گیا۔دورے کے دوران ڈاکٹر پرویز احمد خان نے صحت کے اداروں کو عوام کی خدمت کے لیے مکمل طور پر تیار رکھنے کی ضرورت پر زور دیا۔ انہوں نے خاص طور پر جان بچانے والی اور معمول کی ادویات، آپریشنل ایمبولینسز (102 اور 108)، اور دیگر بنیادی ضروریات کی دستیابی پر توجہ دی۔سی ایم او نے حاملہ خواتین کی برف سے متاثرہ علاقوں سے قریبی زچگی مراکز تک محفوظ نقل و حمل کے لئے مائیکرو پلاننگ کی اہمیت پر زور دیا۔ انہوں نے ان مریضوں کے لیے بھی چوبیس گھنٹے سہولیات کی فراہمی کو یقینی بنانے کی ہدایت دی جو ڈائیلاسز کے محتاج ہیں یا دمہ اور COPD جیسی بیماریوں میں مبتلا ہیں۔سی ایم او نے گورنمنٹ سی ایچ سی منڈی، گورنمنٹ پرائمری ہیلتھ سنٹر سوجیان، پی ایچ سی لوران، اورپی ایچ سی چنڈک کا دورہ کیا۔ انہوں نے تمام ڈاکٹروں اور پیرامیڈیکل سٹاف کو وقت کی پابندی، ڈریس کوڈ پر عمل، اور مریضوں کو بہترین صحت کی سہولیات فراہم کرنے کی ہدایت کی۔برفباری کی وجہ سے بجلی کی ممکنہ بندش سے نمٹنے کے لئے سی ایم او نے بیک اپ پاور سسٹم، سولر سلوشنز، اور جنریٹرز کے لیے پیشگی ایندھن کی دستیابی کو یقینی بنانے پر زور دیا۔ انہوں نے ایمبولینسز کی مکمل تیاری اور ان کے مستقل فعال ہونے کی بھی تصدیق کی۔دورے کے دوران، ڈاکٹر پرویز نے تمام صحت مراکز میں ہیٹنگ سسٹم، میڈیسن اسٹورز، وارڈز، اور لیبر رومز میں کمبل کی دستیابی کو چیک کیا۔ انہوں نے خاص طور پر اس بات کی تصدیق کی کہ سی ایچ سی منڈی اور پی ایچ سی لوران میں چار ایمبولینسز، جن میں سی ایچ سی منڈی کی ایک 108 ایمبولینس بھی شامل ہے، مکمل طور پر فعال اور تیار ہیں۔یہ اقدامات سردیوں کے دوران برفباری سے متاثرہ علاقوں میں رہنے والے عوام کے لیے صحت کی خدمات کو مزید مؤثر اور قابل رسائی بنانے کے عزم کا حصہ ہیں۔ ڈاکٹر پرویز احمد خان نے کہا کہ ان اقدامات سے مریضوں کو درپیش مشکلات کم ہوں گی اور انہیں بہتر سہولیات فراہم کی جا سکیں گی۔
