جموں//سالانہ مشق کے مطابق چائلڈ لائن جموں نے 'چائلڈ لائن سے دوستی' ہفتہ ایس او ایس کے بچوں کے گاؤں گول گجرال کے بچوں کے ساتھ منایا۔تقریب کا آغاز ڈویژنل کمشنر جموں ڈاکٹر راگھو لنگر کے ذریعہ روایتی چراغ روشن کرنے کے ساتھ ہوا اور اس کے بعد بچوں کے حقوق اور بچوں کے مسائل پر ریلی کو جھنڈی دکھا کر روانہ کیا۔اس تقریب کے انعقاد کا مقصد بچوں کو ان کے حقوق اور مسائل سے آگاہ کرنا تھا تاکہ وہ اپنے آپ کو استحصال سے بچا سکیں اور اپنے حق میں بات کر سکیں۔بچوں نے اس موقع پر موجود معززین کو فرینڈشپ بینڈ بھی باندھے۔ ڈاکٹر لنگر نے ایس او ایس چلڈرن و لیج کے کام کاج میں گہری دلچسپی ظاہر کی اور بچوں کے ساتھ بات چیت کی تاکہ ان کی خیریت اور ان کے مسائل جان سکیں۔ڈاکٹر لنگر نے جموں ڈویژن میں چائلڈ لائن خدمات کے کام کے بارے میں بھی دریافت کیا اور چائلڈ لائن جموں کے کام کی تعریف کی۔ انہوں نے عوام سے اپیل کی کہ وہ کسی بھی بچے کو مشکل حالات میں دیکھیں تو 1098 نمبر پر کال کریں۔گاؤں کے ڈائریکٹر جاگیر داس نے کہا کہ ایس او ایس چلڈرن ولیج آف انڈیا ایک آزاد، غیر سرکاری تنظیم ہے جو یتیم اور لاوارث بچوں کے حقوق کی وکالت کرتی ہے۔ انہوں نے کہا"ہم ان بچوں کے لیے پیار کرنے والی، خاندان جیسی نگہداشت پیش کرتے ہیں، جو والدین کی دیکھ بھال کھو چکے ہیں یا ان کے خطرے میں ہیں۔ ہم اپنے پروگراموں کے ذریعے پہنچنے والے ہر بچے کے لیے ایک نگہداشت اور حفاظتی ماحول پیدا کرنے اور اسے برقرار رکھنے کے لیے پرعزم ہیں‘‘۔
’چائلڈ لائن سے دوستی‘ہفتہ کی تقریب ڈوڈہ میں منعقد
ڈوڈہ//چائلڈ لائن ڈوڈہ نے نار ی نکیتن اور بسیرا یتیم خانہ ہاسٹل میں چلڈرن ڈے اور چائلڈ لائن سے دوستی ہفتہ منایا۔چائلڈ لائن ڈوڈہ بچوں کے ساتھ ریلیاں، نکڑ ناٹک وغیرہ جیسے پروگراموں کا ایک سلسلہ منعقد کرنے جا رہا ہے اور اس ہفتے کے دوران بچوں کے حقوق اور حفاظت اور چائلڈ ہیلپ لائن ٹول فری نمبر 1098 کے بارے میں عوام کو آگاہ کرنے جا رہا ہے۔یہ دن ہندوستان کے پہلے وزیر اعظم جواہر لعل نہرو کے یوم پیدائش کی یاد میں بھی منایا جاتا ہے۔پروگرام میں وارڈن ناری نکیتن نازیہ بیگم، کوآرڈینیٹر میناکشی رینا کے علاوہ ٹیم ممبران بشمول صبیحہ خان، سریکھا دیوی اور دیگر عہدیداروں نے شرکت کی۔
