عظمیٰ نیوزسروس
ادھم پور//ضلع ادھم پور کے بلاک پنچاری میں 19اگست کو شروع ہونے والا تین روزہ تاریخی سنکری دیوتا میلہ 30,000سے زیادہ عقیدت مندوں اور زائرین کی زبردست شرکت کا مشاہدہ کرتے ہوئے کامیابی کے ساتھ اختتام پذیر ہوا۔ سنکری دیوتا مندر میں پوجا کرنے اور دیوتا کی نعمتیں حاصل کرنے کے لیے مرکزی زیر انتظام علاقہ بھر سے یاتری میلے کے مقام پر جمع ہوئے۔اختتامی تقریب میں ڈی آئی جی ادھم پور-ریاسی رینج سارہ رضوی، ڈپٹی کمشنر ادھم پور، سلونی رائے، ایس ایس پی ادھم پور، امود اشوک ناگپورے، ڈی ڈی سی ممبر جسویر سنگھ، ڈی ڈی سی نرسو، سباش چندر؛ آئی اے ایس پروبیشنر، سیرت باجی، میلہ آفیسر، تحصیلدار پنچاری، وپن کمار، دیگر افسران، ممتاز سول سوسائٹی کے ارکان اور مقامی باشندے شامل ہوئے۔ انہوں نے سنکری دیوتا کے مندرپر اپنی عقیدت پیش کی۔جلسے سے خطاب کرتے ہوئے ڈی سی نے تقریب کے کامیاب انعقاد پر عوام کو مبارکباد دی۔ضلعی انتظامیہ نے میلے کے پرامن اور کامیاب انعقاد کو یقینی بنانے کے لیے سیکورٹی، پینے کے پانی، بجلی کی بلاتعطل فراہمی، طبی سہولیات، ٹریفک ریگولیشن اور دیگر ضروری خدمات کے وسیع انتظامات کیے تھے۔تہوار کے جذبے کو مزید بڑھاتے ہوئے معروف فنکاروں، مقامی فنکاروں، مختلف تعلیمی اداروں کے طلباء اور ملحقہ علاقوں کے لوک فنکاروں نے روایتی پرفارمنس اور تھیم پر مبنی سکٹس پیش کیے، جنہیں حاضرین سے بے پناہ داد ملی۔
