پاکستانی سیاستدان اور سماجی کارکن سیخ پا

 سرینگر//کشمیر میں جاری فورسز مظالم کے خلاف پاکستان کے حکمرانوں، صحافیوں اور شوبز سے تعلق رکھنے والے افراد نے شدید مذمت کرتے ہوئے عالمی برادری سے اس معاملے میں مداخلت کرنے اور اقوامِ متحدہ سے بھارت کے خلاف کارروائی کرنے کا مطالبہ کردیا۔ ادھر شوپیان قتل عام کیخلاف پاکستان کی پنجاب اسمبلی میں تحریک انصاف کی جانب سے مذمتی قرارداد جمع کرائی گئی ہے ۔پاکستان تحریک انصاف (پی ٹی آئی) کے سربراہ عمران خان نے کشمیر میں فورسز کے ہاتھوں کشمیریوں کے قتل عام کی شدید مذمت کرتے ہوئے کہا کہ وہ کشمیر میں بھارتی افواج کے معصوم کشمیریوں کے خلاف بربریت اور نہتے افراد کے قتل کی شدید مذمت کرتے ہیں۔چیئرمین پی ٹی آئی کا مزید کہنا تھا کہ ’پاکستانی قوم حق خود ارادیت کی جمہوری جدوجہد میں اپنے کشمیری بھائیوں کے ساتھ ہیں‘۔انہوں نے مطالبہ کیا کہ اقوام متحدہ کی سلامتی کونسل وادی میں ستم ڈھانے والے بھارت کے خلاف کارروائی کرے۔پاکستان پیپلز پارٹی (پی پی پی) کے چیئرمین بلاول بھٹو زرداری نے کشمیریوں پر مظالم کی مذمت کرتے ہوئے کہا ہے کہ مودی کشمیری عوام کے خون سے ہولی کھیل رہا ہے جو پرندوں کی مانند بھارتی فورسز کے ہاتھوں مارے جاتے ہیں۔بلاول بھٹو زرداری نے کشمیر کے معاملے پر عالمی برادری کی جانب سے خاموشی اختیار کرنے پر اپنے تحفظات کا اظہار کرتے ہوئے زور دیا کہ عالمی برادری کو وادی میں بھارتی مظالم کا نوٹس لینا چاہیے۔وزیر اعلیٰ پنجاب شہباز شریف نے اپنے ایک پیغام میں کہا کہ کشمیر میں انسانی حقوق کی پامالی پر جان بوجھ کر خاموشی اختیار کرنا جوہر طاقت کے حامل جنوبی ایشیا میں امن و استحکام کے لیے بڑا خطرہ ہے۔شہباز شریف کا مزید کہنا تھا کہ کشمیر میں کشمیریوں کی جانب سے حقِ خود ارادیت کے لیے جدوجہد کی نئی لہر حزب المجاہدین کے کمانڈر برہان وانی سے متاثر ہوکر دوبارہ ابھری ہے۔انہوں نے کہا کہ اقوامِ متحدہ کی قراردادوں کی منظوری کے بعد بھی کشمیری عوام نے حقِ خودارادیت کی جدوجہد میں جو مثالی قربانیاں دی ہیں انہوں نے بہادری، جواں مردی اور اپنے بھرپور عزم و ہمت کا شاندان باب قلمبند کیا۔وزیر اعلیٰ پنجاب شہباز شریف نے مطالبہ کیا ہے کہ عالمی برادری کو کشمیر میں بھارتی مظالم کا نوٹس لینا چاہیے۔سینیٹر انوار الحق کاکڑ نے سماجی رابطے کی ویب سائٹ ٹوئٹر پر کشمیر میں مظالم کی مذمت کرتے ہوئے کہا ہے کہ ’یہ مظالم اس حقیقت کا ثبوت ہیں کہ بھارت کشمیریوں کے عزم کو توڑنے میں ناکام ہوگیا ہے۔انہوں نے مطالبہ کیا کہ عالمی برادری کو مسئلہ کشمیر حل کرنے کے لیے اپنا کردار ادا کرنا چاہیے۔پاکستان کی معروف اینکر پرسن ریحام خان نے بھی سماجی رابطے کی ویب سائٹ پر اپنے ایک پیغام میں کہا کہ انسانی حقوق کیلئے کام کرنے والی تنظیموں کے کارکنان کو بھارتی وزیرِ اعظم نریندر مودی کے دورہ لندن کے دوران اپنا بیان ریکارڈ کروانا چاہیے۔