پاک وزیر اعظم کا بیان حوصلہ افزائ:صلاح الدین

مظفر آباد//حزب سربراہ اور متحدہ کونسل کے چیئرمین سید صلاح الدین نے کہا ہے کہ وزیر اعظم پاکستان نے جنرل اسمبلی میں بھارت کو بے نقاب کرکے کشمیری عوام کی ترجمانی کا حق ادا کیا۔ترجمان متحدہ جہاد کونسل سید صداقت حسین کے مطابق صلاح الدین نے وزیر اعظم شاہد خاقان عباسی کا شکریہ ادا کیا ہے ۔ بیان کے مطابق صلاح الدین جہاد کو نسل کے ایک اجلاس سے خطاب کررہے تھے۔انہوں نے کہا کہ وزیر اعظم پاکستان نے پوری تفصیل اور دلیل کے ساتھ جموں و کشمیر میں جاری زیادتیوں کا ذکرکرکے عالمی برادری کو یہ پیغام دیا کہ جب تک مسئلہ کشمیر کو کشمیری عوام کی رائے کے عین مطابق حل نہیں کیا جائے گا ،خطے میں دائمی امن کا خواب دیکھنا سراب ہے ۔صلاح الدین نے وزیر اعظم پاکستان کی اس تجویز کو بھی سراہا جس میں انہوں نے اقوام متحدہ کو سیکورٹی کونسل کی قرادادوں کو عملانے کیلئے خصوصی ایلچی مقرر کرنے کا مطا لبہ کیا ہے ۔چیئر مین جہاد کو نسل نے کہا کہ اقوام متحدہ اپنا کردار ادا کرنے میں اب تک ناکام ہو چکا ہے اور اس ناکامی کا نتیجہ یہ نکل رہا ہے کہ بھارت کشمیری عوام پرمظالم ڈھا رہا ہے اور انسانی حقوق کی خلاف ورزیوں کا مرتکب ہورہا ہے ۔صلاح الدین نے کہا کہ اگر عالمی برادری یو نہی تماشہ دیکھتی رہی تو وہ دن ضرور آئیگا جب جموں و کشمیر کے عوام کا عالمی اداروں پر سے اعتماد مکمل طور پر ختم ہوگا اور اگر صورتحال وہاں پہنچی تو نہ صرف خطے بلکہ عالمی امن پر بھی اس کے منفی نتائج ہونگے ۔انہوںنے حکومت پاکستان سے مطالبہ کیا کہ سفارتی محاذ کو مزید متحرک کیا جائے اور پوری دنیا میں کشمیری عوام کے تئیں بھارت کا جمہوری روپ بے نقاب کیاجائے۔انہوں نے روہنگیا مسلمانوں کی حالت زار پر عالمی برادری اور خصوصی طور پر عالم اسلام کے بزدلانہ اور معذرت خواہانہ رویے پر افسوس کا اظہار کیا ۔اجلاس میں ہفتہ رفتہ کے دوران جاں بحق ہوئے افرادکوخراج عقیدت ادا کیا گیا۔