یو این آئی
سرینگر// ڈویژنل ریلوے منیجر جموں وویک کمار کا کہنا ہے کہ اعلیٰ صلاحیت والی پارسل ٹرین سروس کے آغاز سے کشمیر کی معیشت کو فروغ ملے گا اور ہائی وے کی رکاوٹوں کے باوجود قابل اعتماد ٹرانسپورٹ یقینی ہوگا۔انہوں نے کہا کہ یہ ایک تاریخی موقع ہے کیونکہ پہلی بار ٹرین کے ذریعے مال سرینگر سے ملک کے باقی حصوں تک پہنچے گا۔موصوف منیجر نے ان باتوں کا اظہار پیر کو لیفٹیننٹ گورنر منوج سنہا کی طرف سے بڈگام سے دہلی تک پہلی پارسل ٹرین کو جھنڈی دکھا کر روانہ کرنے کے بعد نامہ نگاروں کے ساتھ بات کرنے کے دوران کیا۔انہوں نے کہا ‘یہ ایک تاریخی موقع ہے کہ پہلی بار سرینگر سے ٹرین کے ذریعے مال ملک کے باقی حصوں میں پہنچے گا’۔ان کا کہنا تھا ‘سیلاب سے خطے میں سڑکیں بند ہوگئی ہیں جس کی وجہ سے میوہ خراب ہو رہا تھا اس کے پیش نظر ریلوے نے روزانہ بنیادوں پر ایک پارسل ٹرین سروس شروع کی تاکہ یہاں کا سیب اور دوسری پیداوار ملک کے باقی حصوں میں پہنچ سکے ‘۔وویک کمار نے کہا کہ یہ ٹرین 8ڈبوں پر مشتمل ہے اور ہر ڈبے میں 23ٹن کی گنجائش ہے اور س طرح روزانہ 170ٹن سے زیادہ مال ملک کے حصوں میں پہنچ جائے گا۔انہوں نے کہا کہ یہ ٹرین روزانہ چلے گی اور ہر صبح 6 بجے یہاں سے روانہ ہوگی اور بڑی برہمنہ جموں میں اس کا ایک پڑاؤ ہے جہاں سے یہ آدرش نگر دہلی روانہ ہوگی۔
