یو این آئی
نئی دہلی/بین الاقوامی کرکٹ کونسل (آئی سی سی) کی طرف سے 2026کے ٹی-20 عالمی کپ کے لیے ہندوستان میں احمد آباد، دہلی، ممبئی، چنئی اور کولکاتہ کو پانچ میزبان شہروں کے طور پر منتخب کیا گیا ہے ، جبکہ سری لنکا میں کینڈی اور کولمبو شہروں کو منتخب کیا گیا ہے ، تیسرے مقام سے متعلق فیصلہ جلد کیا جائے گا۔ یہ عالمی مقابلہ 7 فروری 2026 سے شروع ہو سکتا ہے اور فائنل میچ 8 مارچ کو احمد آباد کے نریندر مودی اسٹیڈیم میں کھیلا جائے گا۔ آئی سی سی آئندہ ہفتے تک مکمل شیڈول جاری کرنے کی تیاری میں ہے ۔ ہندوستانی کرکٹ کنٹرول بورڈ (بی سی سی آئی) اور پاکستان کرکٹ بورڈ (پی سی بی) کے درمیان ہوئے معاہدے کے مطابق پاکستان اپنے تمام میچ سری لنکا میں کھیلے گا۔اگر پاکستان فائنل میں پہنچتا ہے ، تو فائنل میچ بھی سری لنکا میں کھیلا جائے گا۔ تمام ٹیموں کو چار گروپوں میں تقسیم کیا جائے گا، ہر گروپ میں پانچ ٹیمیں ہوں گی۔ہر ٹیم اپنے گروپ کی دیگر چار ٹیموں سے ایک ایک میچ کھیلے گی۔ ہر گروپ کی سرِفہرست دو ٹیمیں سپر-8 مرحلے میں داخل ہوں گی، جہاں انہیں دو نئے گروپوں (چار چار ٹیموں کے ) میں تقسیم کیا جائے گا۔ سپر-8 کے بعد ہر گروپ کی دو بہترین ٹیمیں سیمی فائنل میں پہنچیں گی، جن کے فاتح فائنل میں آمنے سامنے ہوں گے ۔ میزبان ہندوستان اور سری لنکا کے علاوہ 2024 ٹی-20 ورلڈ کپ کی سات سرکردہ ٹیموں کو براہ راست داخلہ دیا گیا ہے ، جن میں افغانستان، آسٹریلیا، بنگلہ دیش، انگلینڈ، جنوبی افریقہ، امریکہ اور ویسٹ انڈیز شامل ہیں۔جبکہ نیوزی لینڈ، پاکستان اور آئرلینڈ نے اپنی ٹی-20 رینکنگ کی بنیاد پر جگہ بنائی ہے ۔ ہندوستان موجودہ ٹی-20 عالمی چیمپیئن ہے ، اس نے بارباڈوس میں کھیلے گئے فائنل میں جنوبی افریقہ کو شکست دے کر خطاب اپنے نام کیا تھا۔
