رمیش کیسر
نوشہرہ//ٹریفک پولیس نوشہرہ نے ٹریفک قوانین کی خلاف ورزی کرنے والوں کے خلاف ایک بڑی مہم کا آغاز کرتے ہوئے سینکڑوں گاڑیوں کے چالان کئے ہیں اور مختلف گاڑیوں پر سات لاکھ سے زائد کا جرمانہ عائد کیا ہے۔ یہ مہم دسمبر 2024 میں شروع کی گئی، جس کے دوران نوشہرہ کی مختلف سڑکوں پر ٹریفک قوانین کی خلاف ورزی کرنے والوں کو سختی سے ہدایت کی گئی کہ وہ قوانین کی پابندی کریں۔سیکٹر افیسر محکمہ ٹریفک پولیس، اے ایس آئی معروف کی زیر قیادت ایک ٹیم نے اس مہم کا آغاز کیا۔ ٹیم نے 783 گاڑیوں کے ای چالان کئے اور عدالتی چالان موقع پر ہی جاری کئے۔ اس کے علاوہ، ٹریفک قانون کی خلاف ورزی کرنے والی گاڑیوں کو موقع پر ہی 7 لاکھ 90 ہزار روپے کا جرمانہ بھی عائد کیا گیا۔سیکٹر آفیسر اے ایس آئی معروف نے کہا کہ ٹریفک قوانین کی خلاف ورزی کسی بھی قیمت پر برداشت نہیں کی جائے گی اور اس مہم کا مقصد شہریوں کو آگاہ کرنا ہے کہ قوانین کی پابندی کرنا نہ صرف ان کی حفاظت کے لئے ضروری ہے بلکہ یہ شہر کی مجموعی ٹریفک صورتحال کو بہتر بنانے کے لئے بھی اہم ہے۔ انہوں نے مزید کہا کہ ٹریفک پولیس کی ٹیم شہر کے مختلف حصوں میں اس مہم کو کامیابی سے جاری رکھے گی اور آئندہ بھی اس طرح کی مہمات چلائی جائیں گی۔ٹریفک پولیس کی اس مہم کا مقصد لوگوں کو ٹریفک قوانین کی اہمیت سے آگاہ کرنا اور شہر میں ٹریفک کی روانی کو بہتر بنانا ہے۔ سیکٹر آفیسر نے شہریوں سے اپیل کی کہ وہ ٹریفک قوانین کی پابندی کریں تاکہ نہ صرف ان کی جان کی حفاظت ہو بلکہ شہر کی سڑکیں بھی محفوظ رہیں۔
