ترقی، رابطہ ، نوکریوں اور بنیادی ڈھانچے کیلئے متواتر مرکزی معاونت پر زور
عظمیٰ نیوز سروس
نئی دہلی// وزیر اعلیٰ عمر عبداللہ نے نئی دہلی میں وزیر اعظم نریندر مودی سے ملاقات کی اور جموں و کشمیر سے متعلق کئی اہم مسائل، بشمول ریاست کی جلد بحالی، اقتصادی صورتحال اور جموں و کشمیر کی ترقیاتی ترجیحات پر تبادلہ خیال کیا۔میٹنگ کے دوران، وزیر اعلیٰ نے ریاست کی جلد بحالی کے لیے جموں و کشمیر کے لوگوں کی امنگوں سے آگاہ کیا، اس بات پر زور دیا کہ یہ جمہوری اداروں کو مضبوط بنانے، عوامی شراکت کو گہرا کرنے اور خطے کی ترقی کے اگلے مرحلے کو آگے بڑھانے میں ایک اہم قدم ہوگا۔ انہوں نے درخواست کی کہ اس عمل کو جلد از جلد آگے بڑھایا جائے۔
وزیر اعلیٰ نے وزیر اعظم کو جموں و کشمیر کی اقتصادی رفتار اور کلیدی شعبوں میں جاری ترقیاتی اقدامات کے بارے میں آگاہ کیا۔ انہوں نے بنیادی ڈھانچے کی تخلیق، عوامی خدمات کی فراہمی اور فلاحی اقدامات میں حاصل ہونے والی پیشرفت پر روشنی ڈالی، ساتھ ہی ان شعبوں کا خاکہ بھی پیش کیا جن کے لیے مستقل حمایت اور سرمایہ کاری کی ضرورت ہے۔وزیر اعلیٰ نے جموں و کشمیر میں اقتصادی ترقی کو تیز کرنے، کنیکٹیویٹی کو مضبوط کرنے، روزگار کے مواقع پیدا کرنے، بنیادی ڈھانچے کو وسعت دینے اور عوامی فلاح و بہبود کو بڑھانے کے لیے حکومت ہند کی طرف سے مسلسل تعاون کی ضرورت پر زور دیا۔ انہوں نے خطے کی پن بجلی کی صلاحیت کے بھرپور استعمال، سیب کے آنے والے سیزن اور سرینگر ہوائی اڈے کی طے شدہ بندش کے پیش نظر ادھم پور-سرینگر لائن پر ریل خدمات میں اضافہ، نئے سیاحتی سرکٹس کی ترقی، اور جموں و کشمیر کے کسانوں، کاریگروں اور ایم ایس ایم ایس کے لیے مسلسل حمایت پر خصوصی توجہ مبذول کرائی۔انہوں نے کہا”جموں و کشمیر ہندوستان کی ترقی کی کہانی میں ایک مکمل اور نتیجہ خیز شراکت دار بننے کے لیے پرعزم ہے،” ۔وزیر اعلیٰ نے کہا کہ ریاست کی جلد بحالی، حکومت ہند کی مسلسل حمایت کے ساتھ، جامع ترقی، خوشحالی اور اچھی حکمرانی کی طرف جموں و کشمیر کے مارچ کو مزید تقویت دے گی۔وزیر اعظم کے دفتر(پی ایم او)نے ملاقات کی تصدیق کرتے ہوئے کہا کہ وزیر اعظم نریندر مودی نے نئی دہلی میں جموں و کشمیر کے وزیر اعلی عمر عبداللہ سے ملاقات کی۔جموں و کشمیر کو ریاست کا درجہ بحال کرنے اور ترقی کو تیز کرنے کی کوششوں اور سیاحت اور سرمایہ کاری کے بڑھے ہوئے اقدامات کے ذریعے معیشت کو بحال کرنے کے سلسلے میں جاری سیاسی گفتگو کے درمیان میٹنگ کی اہمیت ہے۔
