وزارت داخلہ کانوٹس۔۔۔۔ راہل گاندھی سے شہریت دریافت؟

نئی دہلی//مرکزی وزارت داخلہ نے کانگریس صدر راہل گاندھی کو ان کی شہریت کے سلسلہ میں صورتحال کی وضاحت کرنے کیلئے نوٹس بھیجا ہے۔ بھارتیہ جنتا پارٹی کے ڈاکٹر سبرامنیم سوامی نے وزارت داخلہ کو خط لکھ کر راہول گاندھی کی شہریت کے بارے میں شکایت کی تھی۔ وزارت داخلہ نے شکایت کا نوٹس لیتے ہوئے راہول گاندھی سے ان کی شہریت کے سلسلے میں اصل حقائق بتانے کو کہا ہے۔سبھرامنیم سوامی نے شکایت میں کہا ہے کہ راہول گاندھی 2003 میں برطانیہ کے ہمپشائرمیں واقع ایک کمپنی کے بورڈ آف ڈائرکٹرز میں شامل تھے۔ کمپنی کی2005 اور 2006 میں دائر سالانہ ریٹرن میں راہول گاندھی کی تاریخ پیدائش 19 جون 1970 بتائی گئی ہے اور انہوں نے خود کو برطانوی شہری بتایا ہے۔ سال2009 میں بھی اسی کمپنی کے دستاویزات میںراہول گاندھی کو برطانوی شہری بتایا گیا ہے۔ کانگریس میڈیا سیل کے سربراہ رندیپ سنگھ سرجے والا نے پارٹی ہیڈکوارٹر میں پریس کانفرنس میں کہا کہ سپریم کورٹ نے گاندھی کی غیر ملکی شہریت کے معاملے کو 2015 میں ہی مسترد کردیا تھا لیکن اب چار سال بعد گمراہ کرنے کی کوشش کی جارہی ہے۔