یو این آئی
سرینگر//اپنی آپریشنل صلاحیتوں کے مزید استحکام کے لئے سینٹرل ریزرو پولیس فورس(سی آر پی ایف) نے ہفتے کے روز کشمیر میں ‘وہیلڈ آرمرڈ ایمفیبیئس پلیٹ فارم (ڈبیلو ایچ اے پی) گاڑیاں متعارف کیں جو زمینی و آبی دونوں جگہوں پر کارروائیاں انجام دینے کے لئے ڈیزائن کی گئی ہیں۔اس مخصوص گاڑی کی نمائش جنوبی کشمیر کے ضلع پلوامہ کے لیتہ پورہ علاقے میں انجام دی گئی۔اس موقع پر سی آر پی ایف کے سینئر افسر شیش پال نے میڈیا کو بتایا کہ یہ ایک بکتر بند گاڑی ہے اور بھارت کی واحد گاڑی ہے جو پانی، سڑک اور دلدل تینوں جگہوں پر چلتی ہے۔انہوں نے کہا کہ اس گاڑی کو ڈیفنس ریسرچ ایبڈ ڈیولپمنٹ آرگنائزیشن اور ٹاٹا ایڈوانسڈ سسٹم لمیٹڈ کی لیبارٹری وہیکل ریسرچ ڈیولپمنٹ ایسٹیبلشمنٹ میں تیار کیا گیا ہے۔ان کا کہنا تھا کہ اس گاڑی کا وزن 24 ٹن ہے اور اس کی لمبائی 8 میٹر جبکہ چوڑائی 3 میٹر ہے۔موصوف نے کہا کہ یہ گاڑی دریا میں لہروں کے خلاف بھی چل سکتی ہے۔انہوں نے کہا کہ یہ گاڑی کلی طور پر بلٹ پروف ا وربارودی دھماکہ سے محفوظ ہے۔ان کا کہنا تھا کہ یہ گاڑی پانی میں 8 سے 10 کلو میٹر فی گھنٹہ جبکہ نارمل راستوں پر یہ 140 کلو میٹر فی گھنٹہ کے رفتار سے چل سکتی ہے۔ سی آر پی ایف اہلکاروں کے مطابق گاڑی میں بہت جدید ٹیکنالوجی ہے۔ ہم بلٹ پروف گاڑی کے اندر بیٹھ کر حملہ کر سکتے ہیں۔ اس سے انسداد دہشت گردی کی کارروائیوں میں مدد ملے گی کیونکہ ہم ان اہداف کے قریب پہنچ سکتے ہیں جہاں دہشت گرد چھپے ہوئے ہیں۔
