وارانسی //مرکزی وزیر داخلہ راجناتھ سنگھ نے وادی کشمیر میں داعش کی موجودگی خارج از امکان قرار دیتے ہوئے جنگجوئوں کی صفوں میں شامل ہوئے نوجوانوں سے مین اسٹریم میں شامل ہونے کی اپیل کی اور کہا کہ ان کی معقول معاونت کی جائے گی۔ وارانسی اتر پردیش میں نامہ نگاروں کے ساتھ گفتگو کے دوران مرکزی وزیر داخلہ نے وادی میں داعش کی موجودگی کے امکان کو خارج کردیا۔راجناتھ سنگھ نے وادی میں داعش کی سرگرمیوں پر تبصرہ کرتے ہوئے دوٹوک الفاظ میں کہا’’ایسی رپورٹوں کی کوئی تصدیق نہیں ہوئی ہے،سیکورٹی ایجنسیاں اس معاملے کی تحقیقات کررہی ہیںاور اس بارے میں حکومت کو رپورٹ پیش کئے جانے کے بعد ہی کوئی حتمی رائے قائم کی جاسکتی ہے‘‘۔وزیر داخلہ کا کہنا تھا کہ بھارت کے مسلمان داعش جیسی تنظیم کو ملک میں اپنی جڑیں مضبوط کرنے کی اجازت نہیں دیں گے ۔انہوں نے مزید کہا’’مجھے ملک کے نوجوانوں پر پورا اعتماد ہے کہ وہ آئی ایس آئی ایس کے ہاتھوں گمراہ نہیں ہونگے‘‘۔ راجناتھ سنگھ نے کہا ’’ایک بھارتی مسلمان جو اسلام میں یقین رکھتا ہے، داعش جیسی تنظیم کو ملک میں اپنی بنیاد قائم کرنے کا موقعہ فراہم نہیں کرے گا‘‘۔انہوں نے یہ بات دہرائی کہ جموں کشمیر کیلئے مذاکرات کار کی تقرری کے باوجود جنگجوئوں کے خلاف کارروائیاں جاری رہیں گی اور اس حوالے سے بقول ان کے کسی قسم کی کوئی کوتاہی نہیں برتی جائے گی۔
’وادی میں داعش کی موجودگی خارج از امکان‘
