عظمیٰ نیوز ڈیسک
لندن// نومنتخب برطانوی وزیر اعظم کیئر سٹارمر اور نئے ایم پیز نے عہدے کا حلف اُٹھا لیا، کیئر سٹارمر اور 650 ایم پیز اور ان کی کابینہ نے کامنز رول پر دستخط کردیئے ۔غیر ملکی میڈیا رپورٹس میں کہا گیا ہے کہ سر لنڈسے ہوئل دوبارہ ہاؤس آف کامنز کے اسپیکر منتخب ہو گئے ، نومنتخب برطانوی وزیر شبانہ محمود بھی حلف اُٹھانے والوں میں شامل ہیں۔ اسپیکر کی موجودگی میں تمام ممبران پارلیمنٹ نے ایک ایک کر کے حلف لیا، ایم پیز نے بادشاہ چارلس اور ان کے ورثاء اور جانشینوں سے وفاداری کا حلف اٹھایا۔اسپیکر کی موجودگی میں تمام ممبران پارلیمنٹ نے ایک،ایک کرکے حلف اٹھایا، ساڑھے چھ سو ایم پیز میں سے 335اراکین پہلی بار منتخب ہوئے ، ہاؤس آف کامنز میں 263، تقریباً 40 فیصد خواتین کی بڑی تعداد منتخب ہوئی۔
اس سے قبل اسرائیلی وزیراعظم اور فلسطینی صدر سے نومنتخب برطانوی وزیراعظم سر کیئراسٹارمر نے ٹیلیفون پر خطے میں جاری کشیدگی کی موجودہ صورتحال پر گفتگو کی۔ترجمان برطانوی وزیراعظم دفتر کے مطابق وزیراعظم اسٹارمر نے نیتن یاہو سے غزہ اور لبنان کی صورتحال پر تبادلہ خیال کیا اور اسرائیل کی شمالی سرحد کی صورتحال پر تشویش کا اظہار کیا۔برطانوی وزیراعظم نے غزہ جنگ بندی، یرغمالیوں کی رہائی اور غزہ میں انسانی امداد کی رسائی پر بھی بات کی، تمام فریقین کو احتیاط سے کام لینے کا مشورہ دیا۔برطانوی وزیراعظم اسٹارمر نے فلسطینی صدر محمود عباس سے کہا کہ برطانیہ کی امن عمل میں تعاون کو تسلیم کرنے کی دیرینہ پالیسی میں کوئی تبدیلی نہیں آئی۔نو منتخب برطانوی وزیراعظم اسٹارمر کا مزید کہنا تھا کہ امن عمل کا راستہ فلسطینیوں کا ناقابل تردید حق ہے ۔
نومنتخب ایرنی صدر | 30 جولائی کو حلف اٹھائیں گے
عظمیٰ نیوز ڈیسک
تہران//ایرانی نومنتخب صدر ڈاکٹر مسعود پزشکیان 30 جولائی کو پارلیمنٹ میں حلف اٹھائیں گے ۔مہر خبررساں ایجنسی کے مطابق، نومنتخب ایرانی صدر ڈاکٹر مسعود پزشکیان منگل 30 جولائی کو حلف اٹھائیں گے ۔ایرانی پارلیمنٹ کے ترجمان حجت الاسلام علی رضا سلیمی نے مہر نیوز کے نامہ نگار سے گفتگو کرتے ہوئے کہا ہے کہ طے شدہ پروگرام کے تحت منگل 30 جولائی کو ڈاکٹر مسعود پزشکیان ایران کے اگلے صدر کی حیثیت سے حلف اٹھائیں گے ۔ایرانی آئین کے مطابق سپریم لیڈر آیت اللہ العظمی سید علی خامنہ ای کی جانب سے صدر کے انتخاب کی منظوری کے بعد پارلیمنٹ میں حلف برداری کی تقریب منعقد ہوگی جس میں ایرانی گارڈیئن کونسل، عدلیہ، فوج اور سول اداروں کے حکام شرکت کریں گے ۔
آئین کی شق 121 کے تحت نومنتخب صدر حلف اٹھائیں گے اور اپنی ذمہ داریوں کو بطریق احسن انجام دینے کی قسم کھائیں گے ۔ آخر میں حلف نامے پر دستخط بھی کیا جائے گا۔
