عظمیٰ نیوز سروس
پٹنہ// نتیش کمار نے بہار کے وزیر اعلیٰ کے طور پر دسویں مرتبہ حلف لے لیا ہے۔ پٹنہ کے تاریخی گاندھی میدان میں منعقد اس شاندار تقریبِ حلف برداری میں ریاست کے گورنر عارف محمد خان نے انہیں عہدہ اور رازداری کا حلف دلایا۔ اس موقع پر وزیراعظم نریندر مودی، مرکزی وزرائے اعلیٰ اور این ڈی اے کی حکمرانی والی ریاستوں کے متعدد وزرائے اعلیٰ بھی موجود تھے۔گاندھی میدان میں تقریب کا آغاز قومی ترانے سے ہوا۔ اس کے بعد گورنر کے پرنسپل سکریٹری رابرٹ ایل چانگتھو نے حکم نامہ پڑھ کر سنایا، جس کے مطابق آئین کے آرٹیکل 164(1) کے تحت گورنر نے نتیش کمار کو وزیراعلیٰ نامزد کیا ہے۔
گورنر نے وزیراعلیٰ کی تجویز پر دیگر وزرا کی تقرری کی منظوری بھی دی۔حلف لینے کے بعد نتیش کمار نے وزیراعظم نریندر مودی سے ملاقات کی اور مختصر گفتگو کی۔ اس کے بعد نائب وزرائے اعلیٰ کے عہدے کے لیے سمراٹ چودھری اور وجے کمار سنہا نے حلف اٹھایا، جنہیں نتیش کابینہ میں اہم ذمہ داریاں دی گئی ہیں۔تقریب میں گورنر آرِف محمد خان نے پانچ سے چھ افراد کے گروپ کی شکل میں وزرا کو اسٹیج پر بلا کر حلف دلایا۔ جن وزرا نے حلف لیا ان میں وجے کمار چودھری، وجیندر پرساد یادو، شرون کمار، منگل پانڈے، دلیپ جائسوال، اشوک چودھری، لیشی سنگھ، مدن سہنی، نتن نبین، رام کرپال یادو، سنتوش کمار سومن، سنیل کمار، محمد زماں خان، سنجے سنگھ ٹائیگر، ارون شنکر پرساد، سریندر مہتا، نارائن پرساد، رما نشاد، لکشندر کمار روشن، شریئسی سنگھ، پرمود کمار، سنجے کمار، سنجے کمار سنگھ اور دیپک پرکاش شامل تھے۔حلف برداری کی تقریب میں آندھرا پردیش کے وزیراعلیٰ این چندر بابو نائیڈو، مہاراشٹر کے وزیراعلیٰ دیویندر فڈنویس، گجرات کے وزیراعلیٰ بھوپندر پٹیل، اترپردیش کے یوگی آدتیہ ناتھ، آسام کے ہمنتا بسوا سرما، ناگالینڈ کے نیفیو ریو، راجستھان کے بھجن لال شرما، مدھیہ پردیش کے موہن یادو، اتراکھنڈ کے پشکر سنگھ دھامی، دہلی کی ریکھا گپتا، ہریانہ کے نائب سنگھ سینی اور اڈیشہ کے وزیراعلیٰ موہن چرن ماجھی بھی موجود تھے۔ این ڈی اے کے اتحادی جماعتوں کے سربراہان، اراکینِ اسمبلی اور بڑی تعداد میں کارکنان بھی موجود تھے۔وزیر اعظم نریندر مودی نے جنتا دل (یونائیٹڈ) کے سربراہ نتیش کمار کو بہار کے وزیر اعلی کے طور پر حلف لینے اور بی جے پی لیڈر سمراٹ چودھری اور وجے سنہا کو نائب وزیر اعلی کے طور پر حلف لینے پر مبارکباد دی ہے ۔ وزیر اعظم نے نتیش کابینہ میں وزیر کے طور پر حلف لینے والے لیڈروں کو بھی مبارکباد دی۔ مودی نے کئی مرکزی وزراء کے ساتھ جمعرات کو پٹنہ کے گاندھی میدان میں نتیش کمار اور دیگر لیڈروں کی حلف برداری کی تقریب میں شرکت کی۔ بعد ازاں مسٹر مودی نے سوشل میڈیا پر سلسلہ وار پوسٹس میں سبھی لیڈروں کو مبارکباد دی۔ انہوں نے کہاکہ “مسٹر نتیش کمار کو بہار کے وزیر اعلیٰ کے طور پر حلف لینے پر بہت بہت مبارکباد۔ وہ ایک موثر اور تجربہ کار منتظم ہیں۔ ریاست میں اچھی حکمرانی کا ان کا بہترین ٹریک ریکارڈ ہے ۔ ان کی نئی مدت کے لیے میری دلی نیک تمنائیں!” ایک اور پوسٹ میں انہوں نے کہاکہ “مسٹر سمراٹ چودھری اور مسٹر وجے سنہا کو بہار کا نائب وزیر اعلیٰ بننے پر مبارکباد دی۔ دونوں لیڈروں نے عوام کی خدمت کے لیے نچلی سطح پر بہت کام کیا ہے ۔ ان کے لیے نیک خواہشات۔” ایک الگ پوسٹ میں مسٹر مودی نے کہاکہ “بہار حکومت میں وزراء کے طور پر حلف اٹھانے والوں کے لیے میری نیک خواہشات۔ یہ ایک شاندار ٹیم ہے ، جس میں وقف لیڈر ہیں جو بہار کو نئی بلندیوں پر لے جائیں گے ۔ میری ان کے لیے نیک خواہشات ہیں۔” قابل ذکر ہے کہ مسٹر کمار نے دسویں بار بہار کے وزیر اعلی کے طور پر حلف لیا ہے ۔ ان کے ساتھ چھبیس وزراء نے بھی حلف اٹھایا۔
