سرینگر+ جموں//وزیر اعظم نریندر مودی کے دورہ ریاست کے پیش نظروادی میں بالخصوص سیکورٹی کے غیر معمولی انتظامات کئے گئے ہیں، سرینگر میں جگہ جگہ سیکورٹی فورسز کی موجودگی بڑھا دی گئی ہے جبکہ فوج کو الرٹ کردیا گیا ہے۔ مودی آج دو روزہ دورے پر سرینگر پہنچ رہے ہیں ۔ وہ مختلف ترقیاتی پروجیکٹوں کا افتتاح کرنے کے علاوہ شیر کشمیر یونیورسٹی آف ایگریکلچر سائنسز اینڈ ٹیکنالوجی (سکاسٹ) جموں کے چھٹے جلسہ تقسیم اسناد سے بحیثیت مہمان خصوصی خطاب کریں گے۔ وہ خطہ لداخ کے لیہہ بھی جائیں گے۔ ڈل جھیل کے کناروں پر واقع شیر کشمیر انٹرنیشنل کنونشن سنٹر، جہاں رنگ روڑ سری نگر کا سنگ بنیاد رکھیں گے، کو جانے والی سڑکوں بالخصوص بلیوارڈ روڑ کو ایک روز قبل ہی سیل کردیا گیا۔ اس روڑ پر جمعہ کے روز سینکڑوں کی تعداد میں سیکورٹی فورس اہلکاروں کو تعینات دیکھا گیا۔ ایسے ہی پابندیاں جموں یونیورسٹی کے جنرل زور آور سنگھ آڈیٹوریم کے اردگرد نافذ کی گئی ہیں۔ وزیر اعظم ریاست کا یہ دورہ مرکزی حکومت کے وادی کشمیر میں ماہ رمضان کے دوران سیکورٹی فورسز کے آپریشنز معطل رکھنے کے ایک غیرمعمولی اعلان کے محض تین روز بھی کررہے ہیں۔ سری نگر اور جموں کے داخلی راستوں پر چیک پوائنٹس قائم کئے گئے ہیں جبکہ شبانہ گشت بھی جاری ہے۔ سری نگر میں مختلف سڑکوں بالخصوص ائرپورٹ روڑ پر موبائل چیک پوائنٹس قائم کئے گئے ہیں جہاں ریاستی پولیس اور سینٹرل ریزرو پولیس فورس (سی آر پی ایف) کے اہلکار تعینات کئے گئے ہیں۔ سری نگر کے ائرپورٹ روڑ پر روزانہ کی بنیاد پر سفر کرنے والوں نے بتایا کہ اس روڑ پر کئی ایک مقامات پر عارضی چیک پوائنٹس قائم کئے گئے ہیں ۔شمالی کشمیر اور جنوبی کشمیر کے اضلاع کو سری نگر سے جوڑنے والی سڑکوں پر بھی سیکورٹی فورسز نے موبائل چیک پوائنٹس قائم کئے ہیں۔ وزیر اعظم اپنے دورے کے دوران وادی میں شمالی ضلع بانڈی پورہ میں بننے والے 330 میگاواٹ کی صلاحیت والے کشن گنگا پن بجلی پروجیکٹ کا رسمی افتتاح کریں گے اور 939 کروڑ کی لاگت سے تعمیر ہونے والے سری نگر رنگ روڑ پروجیکٹ کا سنگ بنیاد رکھیں گے۔ وزیر اعظم امکانی طور پر زوجیلا ٹنل پروجیکٹ کا بھی سنگ بنیاد رکھیں گے اور لیہہ میں منعقد ہونے والی ایک تقریب میں شرکت کریں گے۔ وزیر اعظم جموں میں قیام کے دوران ضلع ریاسی میں واقع ’ماتا ویشنو دیوی مندر‘ کو جانے والے 7 کلو میٹر طویل متبادل راستے کو یاتریوں کے لئے کھول دیں گے۔ وہ ایک ہزار میگاواٹ کی صلاحیت والے پکل ڈل پن بجلی پروجیکٹ اور جموں رنگ روڑ پروجیکٹ کا سنگ بنیاد رکھیں گے۔ وہ شیر کشمیر یونیورسٹی آف ایگریکلچر سائنسز اینڈ ٹیکنالوجی (سکاسٹ) جموں کے چھٹے جلسہ تقسیم اسناد سے بحیثیت مہمان خصوصی خطاب کریں گے۔
مودی کا دورہ ریاست آج سے
