عظمیٰ نیوز سروس
کٹھوعہ//گزشتہ کچھ عرصہ سے جموں خطہ میں ملی ٹینٹوں کی بڑھتی ہوئی کاررائیوں پر تشویش کا اظہار کرتے ہوئے سائنس اور ٹکنالوجی کے مرکزی وزیر مملکت ڈاکٹر جتیندر سنگھ نے کہا کہ وادی کشمیر میں سیکورٹی فورسز کے دباؤ کے بعد بے چین دہشت گرد فرار ہیں اور اپنی سرگرمیوں کا مرکز جموں خطہ پر مرکوز کرنے کی کوشش کر رہے ہیں لیکن سماج مخالف عناصر کی مذکورہ سرگرمیوں کو کبھی بھی کامیاب نہیں ہونے دیا جائے گا۔گور نمنٹ میڈیکل کالج ہسپتال میں کامیاب آرتھوپیڈک سرجری کرنے والے زخمی شہری اوم پرکاش کی عیادت کرنے اور آنجہانی کمل جیت شرما کے اہل خانہ سے تعزیت کرنے کے بعد ڈاکٹر جتیندر سنگھ نے کہا کہ بنیادی فرق یہ ہے کہ سرحد پار سے دہشت گردی کے اسپانسر یہ سمجھنے میں ناکام ہے کہ وہ کبھی بھی اس خطے میں مقامی آبادی کی زمینی حمایت حاصل نہیں کر پائیں گے۔انہوں نے کہا کہ ہیرا نگر سیکٹر سمیت یہ پورا خطہ جہاں یہ واقعہ پیش آیا ہے وہاں ایسے لوگ آباد ہیں جو بنیادی طور پر قوم پرست اور محب وطن ہیں اور یہ موجودہ واقعہ کے دوران بھی ظاہر ہوا جہاں عام شہری نہ صرف سیکورٹی فورسز کے شانہ بشانہ کھڑے رہے بلکہ مشتبہ دہشت گردوں کی نقل و حرکت کے بارے میں فیصلہ کن معلومات اورچھپے دہشت گردوں کو پکڑنے میں سیکورٹی فورسز کی مدد بھی کی ۔ڈاکٹر جتیندر سنگھ نے کہا کہ پنڈت پریم ناتھ ڈوگرہ کی سرزمین ہونے کے ناطے، اس خطہ کے لوگوں نے کئی دہائیوں سے ملک دشمن طاقتوں کے خلاف ہر شکل میں جدوجہد کی ہے اور اس لئے دہشت گردوں اور ان کے سرپرستوں کو ایک بار اور ہمیشہ کیلئے سمجھ لینا چاہیے کہ اس خطے میں بھارت مخالف دہشت گردی کے بیج بونا نہ صرف ان پر بومرانگ ہوگا بلکہ انہیں ایک مناسب سبق بھی سکھائے گا۔وزیر اعظم مودی کی دہشت گردی کے تئیں زیرو ٹالرنس کی پالیسی کو حکومت کے نقطہ نظر کے بنیادی منتر کے طور پر بتاتے ہوئے ڈاکٹر جتیندر سنگھ نے کہا کہ اس طرح کے واقعات دہشت گردی کے آخری مرحلے میں داخل ہونے اور دہشت گرد اپنے آپ کو اپنے انجام تک پہنچانے کا بھی اشارہ ہیں۔ انہوں نے کہا کہ سابقہ حکومتوں کے برعکس پی ایم نریندر مودی کی سربراہی والی حکومت نے دنیا کے سامنے صحیح وقت اور صحیح جگہ پر حملہ کرنے کی اپنی صلاحیت کو ثابت کیا ہے جو سرجیکل اسٹرائیک اور اسی طرح کی دیگر فیصلہ کن کارروائیوں سے ظاہر ہوا تھا جو کہ 2018ء میں کئے گئے تھے۔سول انتظامیہ اور سیکورٹی فورسز کے درمیان ہم آہنگی کی تعریف کرتے ہوئے ڈاکٹر جتیندر سنگھ نے کہاکہ سیکورٹی ماہرین سے کچھ اہم تجاویز موصول ہوئی ہیں جو متعلقہ حکام کے سامنے رکھی جائیں گی اور جو مستقبل میں کسی بھی ممکنہ دہشت گردی کی سرگرمیوں کے لئے مزید رکاوٹ بن سکتی ہیں۔ڈاکٹر جتیندر سنگھ نے کہا کہ وی ڈی جی کو دوبارہ زندہ کرنے اور مزید موثر بنانے کی ضرورت ہے ۔امرجیت شرما کے سوگوار خاندان سے اپنے دورے کے دوران، ڈاکٹر جتیندر سنگھ نے کہا، اس خاندان کو اس طرح کے واقعات کے بعد عام طور پر توقع سے کہیں زیادہ راحت، امداد اور مدد فراہم کی جائے گی۔
