مزید خبریں

ارشاد احمد

گاندربل//گاندربل کے مختلف مقامات پر غیر معیاری اور ناقص اشیائے خوردنی فروخت کرنے والوں کے خلاف کارروائی کرتے ہوئے  ایڈیشنل ضلع مجسٹریٹ گاندربل نے متعدد کمپنیوں کے خلاف ہزاروں روپئے کا جرمانہ عائد کیا ۔ مختلف علاقوں میں دکانداروں سے خوردنی اشیاء کے نمونے حاصل کرنے کے بعد ان کو جانچ پڑتال کیلئے لیبارٹری روانہ کیا گیا جہاں جانچ کے بعد کئی چیزیں غیر معیاری ثابت ہوئیں۔ ایڈیشنل ضلع مجسٹریٹ گاندربل فاروق احمد بابا کی جانب سے اس سلسلے میں کئی کمپنیوں پر ر روپئے کا جرمانہ عائد کیا گیا۔اس موقع پر متعلقہ اداروں کو ہدایت کی گئی کہ وہ بازاروں کی چیکنگ تیز کریں اور تمام کمپنیوں کی تیار کردہ خوردونوش کے نمونے باقاعدہ جمع کریں تاکہ صارفین کو صحت بخش اور محفوظ خوراک فراہم کیا جا سکے۔63ہزا

 

 

 

 

اننت ناگ// اننت ناگ قصبے میں مختلف مکانات کے مالکان اور سرکاری محکموں کے زیر قبضہ/مکانوں کے کرایہ کے تعین کے معاملات پر تبادلہ خیال کرنے کیلئے ڈسٹرکٹ رنٹ اسسمنٹ کمیٹی کی میٹنگ ڈی سی اننت ناگ ڈاکٹر پیوش سنگلا کی صدارت میں منعقد ہوئی۔انہوں نے محکمہ آر اینڈ بی کو رنٹ اسسمنٹ کیسز کے عمل کو تیز کرنے اور آر اینڈ بی ڈپارٹمنٹ کے تازہ ترین کرایہ کے شیڈول کے مطابق کرائے کے کیسز کا دوبارہ جائزہ لینے کی ہدایت کی۔ انہوں نے افسران سے کہا کہ وہ کرایہ کے معاملات میں تیزی لائیں تاکہ طویل عرصے سے زیر التواء کرایہ کے تعین کے معاملات کو مقررہ مدت میں طے کیا جاسکے۔میٹنگ میں جن افسران نے شرکت کی ان میں اے ڈی سی اننت ناگ، گلزار احمد، ایڈیشنل کمشنر اسٹیٹ ٹیکس ڈیپارٹمنٹ (ایڈمنسٹریشن اینڈ انفورسمنٹ) کشمیر، منظور احمد، سابق انجینئر آر اینڈ بی اننت ناگ، اسٹیٹ ٹیکس آفیسر اننت ناگ حامد گنائی اور سرکاری محکموں کے دیگر افسران نے شرکت کیاجلاس میں پرائیویٹ عمارتوں کے مالکان جہاں سرکاری دفاتر واقع ہیں نے بھی شرکت کی۔

 

 

 

 

 

 

سرینگر//ضلع ترقیاتی کمشنر سرینگر محمد اعجاز اسد نے ڈی سی آفس کمپلیکس کے میٹنگ ہال میں روزگار پیدا کرنے والی مختلف اسکیموں کے تحت عمل آوری اور پیش رفت کا جائزہ لینے کے لیے ضلع کے تمام سیکٹرل افسران اور بینکروں کی ایک میٹنگ کی صدارت کی۔ یہاںمیٹنگ میں روزگار پیدا کرنے کی مختلف اسکیموں جیسے NRLM، PMEGP (KVIB)، PMEGP (KVIC) PMEGP (DIC)، KCC، ST/SC اور مدرا لون کے تحت کی گئی کارکردگی کے حوالے سے تفصیلی بات چیت کی گئی۔اس موقع پر ضلعی ترقیاتی کمشنر کو بتایا گیا کہ رواں مالی سال کے سالانہ کریڈٹ پلان کے تحت 145792 کے ٹارگٹ کے مقابلے میں ستمبر 2021 تک مختلف روزگار پیدا کرنے والی اسکیموں کے تحت 67257 فوائد کا احاطہ کیا گیا۔اسی طرح ضلع میں استفادہ کنندگان کو 2935 کروڑ روپے کی رقم تقسیم کی گئی ہے جبکہ اسی مدت کے دوران 6574 کروڑ روپے کے مالی ہدف کے مقابلہ میں ضلع میں ان کی آمدنی پیدا کرنے والے یونٹس قائم کیے گئے ہیں۔ڈی ڈی سی کو مزید بتایا گیا کہ پی ایم ای جی پی کے تحت کل 162 کیسز اٹھائے گئے جن میں سے 1382 کیسز پر بینکوں نے کارروائی کی اور 941 کیسوں کے حق میں قرض دیا گیا۔ اسی طرح NULM اسکیم کے تحت 548 کیسز اٹھائے گئے اور 434 کیسز پر کارروائی کی گئی، جبکہ 312 کیسوں کے حق میں ادائیگی کی گئی۔مدرا اسکیم کے سلسلے میں، ڈی ڈی سی کو بتایا گیا کہ اب تک مختلف محکموں کی طرف سے 8632 کیسوں کو سپانسر کیا گیا ہے اور ضلع سرینگر کے مستفیدین میں 253.00 کروڑ روپے کی رقم تقسیم کی گئی ہے۔اس موقع پر بات کرتے ہوئے ڈی ڈی سی نے بینک حکام اور لائن ڈپارٹمنٹس کے افسران سے کہا کہ وہ ایک دوسرے کے ساتھ قریبی تال میل برقرار رکھیں تاکہ مستحقین کو قرض کی بروقت فراہمی کو یقینی بنایا جا سکے۔ انہوں نے افسران سے کہا کہ وہ مقامی نوجوانوں کو آمدنی پیدا کرنے والے یونٹس قائم کرنے کی ترغیب دیں۔ انہوں نے کہا کہ زیادہ سے زیادہ تعلیم یافتہ اور بے روزگار نوجوانوں کو مختلف سرکاری اسکیموں کے دائرے میں لانے کی ضرورت ہے۔ڈی ڈی سی نے ان پر مزید زور دیا کہ وہ بیروزگار نوجوانوں کو مختلف کاروباری اسکیموں کے بارے میں آگاہ کرنے کے لیے ضلع بھر میں بیداری کیمپوں کا انعقاد کریں۔ انہوں نے محکموں پر زور دیا کہ وہ خود روزگار سکیموں کے تحت نوجوانوں کو ہاتھ میں لے کر زیادہ سے زیادہ کیسوں کو سپانسر کریں، کیونکہ ان سکیموں میں بہت بڑی صلاحیت موجود ہے۔انہوں نے متعلقہ افراد سے روزگار پیدا کرنے کی مختلف اسکیموں کے حوالے سے خصوصی انرولمنٹ مہم شروع کرنے کو بھی کہا۔ انہوں نے متعلقہ افراد کو ہدایت کی کہ وہ ضلع میں روزگار کے مزید مواقع پیدا کرنے کے لیے سرشار کوششیں کریں تاکہ بے روزگار نوجوانوں کو ضروری پلیٹ فارم مہیا کر کے ان کی مدد کی جا سکے تاکہ وہ عزت اور وقار کے ساتھ روزی کما سکیں۔میٹنگ میں جوائنٹ ڈائریکٹر پلاننگ، ڈسٹرکٹ پروگرام آفیسر، ICDS، جنرل منیجر DIC، لیڈ ڈسٹرکٹ منیجر اور متعلقہ محکموں کے تمام سیکٹرل/ضلعی افسران اور ضلع کے سینئر بینک افسران نے شرکت کی۔

 

 

 

 

 سرینگر// شوپیاں ضلع میں حکام نے بدھ کے روز نجی عمارتوں، دکانوں کو مسمار کرنے اور روشنی ایکٹ کے تحت دی گئی اراضی کی واپسی شروع کی، جسے جموں و کشمیر ہائی کورٹ نے مسترد کر دیا تھا۔ایک سرکاری ترجمان نے کہا’’اس ایکٹ کے تحت دی گئی اراضی کو واپس لینے کے علاوہ، ریاستی اراضی پر قابضین کے خلاف ایک انسداد تجاوزات مہم کو بھی ضلع میں ریونیو حکام نے تیز کر دیا ہے‘‘۔انہوں نے کہا کہ روشنی ایکٹ سے فائدہ اٹھانے والوں کے خلاف پہلی مہم زینہ پورہ کے آونیورا حلقہ میں شروع کی گئی اور مہم کے دوران 15 کنال اراضی واگزار کرائی گئی اور یہ کارروائی ضلع میں زوروں پر ہے۔ترجمان نے کہا کہ تجاوزات کی زد میں آنے والی اراضی کی گاؤں کے لحاظ سے فہرست بنائی گئی ہے اور آنے والے دنوں میں بے دخلی کا عمل مرحلہ وار کیا جائے گا۔شوپیان کے ضلع مجسٹریٹ سچن کمار ویشیا نے کہا کہ ہائی کورٹ کی ہدایات پر عمل درآمد کیا جائے گا تاکہ تجاوزات کی گئی اراضی کے ساتھ ساتھ روشنی ایکٹ 2007 کے تحت الاٹ کی گئی سرکاری اراضی کو بھی حاصل کیا جا سکے۔

 

 

 

سرینگر//حضرت شیخ سید عبدالقادر جیلانیؒ کے عرس کی نسبت سے حقانی میموریل ٹرسٹ کی ایک آن لائن کانفرنس منعقد ہوئی جس کی صدارت مولانا شوکت حسین کینگ نے کی۔ ٹرسٹ کے سرپرست اعلیٰ سید حمید اللہ حقانی نے کہا کہ آج کے پر آشوب دور میں حضرت شیخ سید عبدالقادر جیلانیؒ کی تعلیمات کو اجاگر کرنالازمی ہے۔ مولانا شوکت حسین کینگ نے کہاکہ تاجدارِ اولیا ہونے کے ساتھ ساتھ حضرت شیخ سید عبدالقادر جیلانیؒ قلم کے شہسوار گردانے جاتے ہیں۔ انہوں نے کہا کہ حضرت محبوب سبحانیؒ مفسر قران بھی تھے اور انکا ترجمہ دوجلدوں میں اندلس اور مصر میں موجود ہے اوراب چندجلدوں میں شائع ہوا ہے۔انجمن حمایت الاسلام کے سربراہ مولانا خورشید احمد قانونگو نے انکی تصانیف و تالیفات کا ذکر کرتے ہوئے کہا کہ انکی شخصیت عالم اسلام میں لاثانی ہے ۔کانفرنس سے کئی دیگر علماء نے بھی خطاب کیا۔ 

 

 

 

 سرینگر//مرکز شعرو ادب دلنہ کے زیر اہتمام گرلز ہائی اسکول دلنہ میں ایک محفل افسانہ منعقد ہواجس میں وادی کے جن معروف افسانہ نگاروں نے شرکت کی اُن میں رحیم رہبر، جی ایم ماہر، ناصر ضمیر ،رؤف قیاسی رمضان، جوہر خالد، بشیر تلگامی ،مشتاق سنبھلی ،رافعہ ولی، حبیب ہمراز، عظیم تاپری اور ایف آزاد دلنوی شامل ہیں۔ محفل میں یوسف صمیم صدر شعرو ادب سنگرامہ نے بھی شرکت کی ۔محفل کی صدارت معروف افسانہ نگار رہیم رہبر نے کی جبکہ جی ایم ماہر اور ناصر ضمیر بالترتیب بطور مہمان خصوصی اور مہمان ذی وقار ایوان صدارت میں موجود رہے۔محفل میں ادارے کی طالبات اور اساتذہ نے شرکت کی۔

 

 

 

سرینگر//گلشن کلچرل فورم کشمیر نے آروہ بیروہ میں سرکردہ محقق، ادیب اور شاعر حکیم غلام حسن شہباز کی برسی پر ایک ادبی تقریب منعقد کی۔ تقریب کی صدارت فورم کے صدر سید بشیر کوثر نے کی۔ تقریب میں مرحوم کی ادبی زندگی اور ان کی تصنیفات کے حوالے سے مقالے پیش کئے گئے۔ فورم کے جنرل سیکریٹری گلشن بدرنی نے خطبہ استقبالیہ میں حکیم شہباز کے ادبی کارناموں کا ذکر کرتے ہوئے کہا ہے کہ کمراز کی ادبی شخصیتوں میں شہباز کی ادبی خدمات بے مثال ہیں۔ تقریب میں حکیم عبدالرحمان ڈار ، مقبول شیدا، لطیف نیازی، خورشید خاموش اور ادریس بدرنی کے علاوہ مقامی لوگوں کی بھاری تعداد موجود تھی۔ اس موقعے پر مرحوم کے حق میں ایک دعائیہ مجلس بھی آراستہ ہوئی۔

 

 

 

سرینگر//امن بہار ریلی 21نومبر بروز اتوار شیر کشمیر پارک میں انجا دی جائے گی جس میں امبیدکرسماج پارٹی کے ریاستی صدر فیاض احمد بٹ ،قومی صدربھائی تیج سنگھ اور سپریم کورٹ کے سینئر ایڈوکیٹ محمود پر اچا، ایڈوکیٹ پردیپ ساگر ،نیشنل سیکریٹری زاہد اور دیگر لیڈران شرکت کریں گے ۔ موصولہ بیان کے مطابق جموں وکشمیر میں حالات بد سے بدتر ہوتے جا رہے ہیں اسلئے امبیدکرسماج پارٹی پورے جموں وکشمیر میں امن بحالی کیلئے زمینی سطح پر کا م کر ے گی۔بیان میں عوام سے اپیل کی گئی ہے کہ اس امن بہار ریلی میں شرکت کریں۔

 

 

 

سرینگر //ڈائریکٹر جنرل باغبانی کشمیر اعجاز احمد بٹ نے کیلر شوپیاں میں محکمہ کی جانب سے منعقدہ بیداری کیمپ میں شرکت کی ۔ کیمپ کا انعقاد قبائلی آبادی کیلئے کیا گیا تھا۔کیمپ کا مقصد قبائلی اور دور دراز لوگوں کو مختلف سرکاری اسکیموں کے بارے میں آگاہ کرنا تھا۔کیمپ میں دیگر محکمہ جات کے عہدیداروںنے بھی شرکت کی ۔ کیمپ کے دوران تمام محکموں کے نمائندوں نے متعلقہ اسکیموں پر روشنی ڈالی اور شرکاء کوحکومت کے ذریعہ روزگار پیدا کرنے اور قبائلی برادری کی بہتری کے لئے کئے گئے مختلف اقدامات کے بارے میں آگاہ کیا۔کاشتکاروں سے خطاب کرتے ہوئے ڈی جی ہارٹیکلچر نے محکمہ باغبانی کی طرف سے نافذ کی جانے والی ترقیاتی سکیموں کے بارے میں بتایا اور ان سکیموں کے تحت باغبانوں کو فراہم کی جانے والی مراعات کے بارے میںآگاہ کیا جن کا مقصد ان کسانوں کی سماجی و اقتصادی ترقی ہے۔ انہوں نے مزید کہا کہ لیفٹیننٹ گورنر کی ہدایت پر محکمہ نے سرحدی اور قبائلی علاقوں تک رسائی کیلئے بڑے پیمانے پر مہم شروع کر دی ہے جس کیلئے انہوں نے مزید ایسے پروگرام منعقد کرنے کی یقین دہانی کرائی ہے ۔انہوں نے شرکا ء پر زور دیا کہ وہ آگے آئیں اور محکمہ کی سکیموں سے فائدہ اٹھائیں ۔اس کے علاوہ انہوں نے کاشتکاروں کو یقین دلایا کہ محکمہ باغبانی سے وابستہ کسانوں کیلئے چوبیس گھنٹے دستیاب رہے گا ۔ انہوں نے اس موقع پر ضرورت مند بچوں میں اسٹیشنری وغیرہ بھی تقسیم کی۔

 

 

 

سرینگر//اپنی پارٹی صدر سید محمد الطاف بخاری کے والداورجموں وکشمیر کے معروف تاجر سید محمد اقبال بخاری کے رسم ِ چہارم پر بدھ کو اُن کی آبائی رہائش گاہ لڈورہ بارہمولہ میںقرآن خوانی اور فاتحہ خوانی کا اہتمام کیاگیا۔ موصوف مختصر علالت کے بعد اتوار کو سکمز میں انتقال کرگئے تھے۔اس سلسلے میںاعلیٰ انتظامی عہدیداروں، مختلف سیاسی جماعتوں کے وفود، سول سوسائٹی ممبران، علماء ، اپنی پارٹی لیڈران، کارکنان اور علاقے کے لوگوں نے لڈورہ پہنچ کر غمزدہ کنبے کی ڈھارس بندھائی اور سوگوار کنبہ کے ساتھ یکجہتی کا اظہار کیا۔ ایک بیان میںالطاف بخاری نے اُن سبھی افراد، وفود اور تنظیموںکا تہہ دل سے شکریہ ادا کیا ہے جنہوں نے اُن سے تعزیت پرسی کی۔ انہوں نے اخبارات ،سوشل میڈیا، فون کے ذریعے تعزیت کرنے والوں کا بھی شکرادا کیا ۔ انہوں نے کہا ’’ہم اُن سبھی کے شکر گزار ہیں جنہوں نے اِس مشکل گھڑی میں ہمارا ساتھ دیا، ہماری ڈھارس بندھائی اور یکجہتی کا اظہار کیا جس سے ہمیں اِس غم سے باہر نکلنے میں مدد ملی۔ ہم اُن سب کے مقروض ہیں جو طویل سفر کر کے ہمارے پاس آئے ، ہمارے ساتھ کچھ پل گزارے، ہمارا حوصلہ بڑھایا‘‘۔ انہوں نے اپنے والد مرحوم سید محمد اقبال بخاری کے ایصال ِ ثواب کے لئے دعا کی درخواست کی ہے۔ 

 

 

 

بڈگام//ضلع ترقیاتی کمشنر بڈگام شہباز احمد مرزا نے کہا کہ ضلع بھر میں ایک تحریک شروع کی گئی ہے تاکہ بے روزگار نوجوانوں تک رسائی حاصل کی جائے تاکہ یوتھ کلبوں کے ذریعے روزگار پیدا کرنے والی مختلف اسکیموں کو اپنا کر خود کو بااختیار بنانے میں مدد کی جاسکے۔انہوں نے کانفرنس ہال میں محکمہ روزگار اور مشاورتی مرکز بڈگام کے زیر اہتمام بیداری کیمپ کم ورکشاپ سے خطاب کرتے ہوئے کہا کہ ایسے نوجوان دوسرے خواہشمند نوجوانوں کو اس طرح کے مواقع کی طرف راغب کرنے میں بھی اہم کڑی ثابت ہوں گے۔دن بھر جاری رہنے والے اس پروگرام میں بے روزگار تعلیم یافتہ نوجوانوں کی بڑی تعداد نے شرکت کی۔انہوںنے مزید کہا کہ بے روزگار نوجوانوں کے لیے ضروری ہے کہ وہ مختلف سرکاری دفاتر سے رابطہ کریں۔خود روزگار پیدا کرنے والی مختلف اسکیموں کے بارے میں، خود کو رجسٹر کریں اور اپنی پسند کے کاروباری یونٹ کو جمع کروائیں جس میں وہ دلچسپی رکھتے ہیں۔انہوں نے کہا کہ ایمپلائمنٹ اینڈ کونسلنگ سنٹر درخواستوں کی جانچ پڑتال اور فلٹر کرے گا اور اسے مختلف محکموں کو بھیجے گا۔ڈی سی نے کہا کہ حکومت تعلیم یافتہ نوجوانوں کو بااختیار بنانے کے لیے پرعزم ہے۔ انہوں نے کہا’’ہمارا کم از کم ہدف کم از کم 1500 نوجوانوں کو رجسٹر کرنا ہے اور اس کی بالائی حد متعین نہیں ہے‘‘۔پروگرام کے دوران مختلف شعبہ جات کے افسران نے شرکاء کو ضلع بھر میں نافذ اسکیموں اور دیگر فوائد سے آگاہ کیا۔ مقررین نے بے روزگار نوجوانوں پر زور دیا کہ وہ آگے آئیں اور لائن ڈپارٹمنٹس کی جانب سے نافذ کی جانے والی مختلف اسکیموں کے تحت فوائد حاصل کریں۔

 

 

 

 

 

سرینگر//جموںو کشمیر میں قائم آئی ٹی آئی اداروں میں ’سیلف فائنانس‘ٹریڈ کیلئے تعینات عارضی ملازمین تنخواہوں میں اضافہ کی یقین دہانیوں کے باجود اضافہ نہ کرنے پر مالی مشکلات سے دو چار ہیں ۔ مذکورہ ملازمین نے جمعرات کو ایک گھنٹے کا قلم چھوڑ ہڑتال کی ۔انہوںنے بتایا کہ اگرچہ سرکار نے کئی شعبوں کے ملازمین کی تنخواہوں میں اضافہ کیا گیاہے تاہم وہ ہنوز منتظر ہیں ۔انہوں نے مزید بتایا’’ہم پچھلے ایک سال سے بار بار محکمہ سے اپنی تنخواہوں میں اضافہ کا مطالبہ کر رہے ہیں۔اس سلسلے میں پرنسپل سیکریٹری نے ڈائریکٹر اسکل ڈیولپمنٹ کو خط لکھا تھا  کہ متعلقہ دفتر کو تجویز بھیجیں۔انہوں نے بتایا کہ وہ فائل اب بھی ڈائریکٹوریٹ میں پڑی ہے اور ملازمین کو طرح طرح کے مشکلات کا سامنا ہے۔

 

 

 

اننت ناگ//ضلع انتظامیہ اننت ناگ نے حال ہی میں تعینات پنچایت اکاؤنٹس اسسٹنٹ اور درجہ چہارم کے ملازمین کو مبارکباد دی۔ڈی ڈی سی چیئرمین ایم وائی گورسی کے ذریعہ روزگار مہااتسو کے تحت منعقدہ تقریب کے دوران کل 10 شرکاء کو نوازا گیا۔شرکاء نے اپنی کامیابی کو تسلیم کرنے پر ضلعی انتظامیہ کا شکریہ ادا کیا۔ڈپٹی کمشنر اننت ناگ ڈاکٹر پیوش سنگلا نے کہا کہ یوگیتا سے روزگار مہااتسو کے بینر تلے ضلع انتظامیہ ضلع کے ہونہار نوجوانوں کی کامیابی کا جشن منا رہی ہے۔انہوں نے کہا کہ حکومت کی جانب سے حالیہ میرٹ کی بنیاد پر تقرریاں ضلع کے نوجوانوں کے لیے حوصلہ افزا ہیں اور انہیں تعلیمی میدان میں بہترین کارکردگی دکھانے کی ترغیب دیں گی۔ انہوں نے مزید کہا کہ ضلع عوام میں بیداری پھیلانے کے لیے آنے والے ہفتوں میں اس طرح کے بہت سے پروگرام منعقد کرنے کا ارادہ رکھتا ہے۔اعزازی تقریب میں پی آر آئی، ایس ڈی ایم پہلگام، اے سی پی، سی ای او اور ضلع انتظامیہ کے دیگر اعلیٰ افسران نے شرکت کی۔

 

 

 

 

 

 

 

 

 

 سرینگر//پردیش کانگریس کمیٹی کے صدر غلام احمد میر نے حیدرپورہ جھڑپ کی عدالتی تحقیقات کی مانگ کرتے ہوئے لوگوں پر زور دیا کہ وہ جموں و کشمیر کے تئیں مرکز کی غلط پالیسیوں کی مخالفت کرنے کیلئے ایک ہو جائیں۔کے این ایس کے مطابق غلام احمد میر نے کہا ہے کہ یہ بہترین وقت ہے جب لوگوں کو باہر آکرکر بی جے پی حکومت سے موجودہ صورتحال اور جموں و کشمیر کے تئیں اس کی غلط پالیسیوں کی وجہ سے ہونے والے نقصانات پر وضاحت طلب کرنی چاہیے۔جن جاگرن ابھیان کے پروگرام کے تحت اونتی پورہ پلوامہ میں عوامی جلسہ سے خطاب کرتے ہوئے غلام احمد میر نے جموں و کشمیر کی موجودہ صورتحال پر مرکز کو تنقید کا نشانہ بناتے ہوئے کہایہ صحیح وقت ہے جب لوگوں کو باہر نکل کر اپنے خدشات، اور ان مصائب کا مثبت جواب تلاش کرنا چاہیے جن کا وہ مرکز کی بی جے پی حکومت کی طرف سے جموں و کشمیر کے لیے اپنائی گئی پالیسیوں کی وجہ سے سامنا کر رہے ہیں۔ میر نے مزید کہا کہ مرکز کولوگوںکے دلوں کو جیتنے کے لیے کام کرنا چاہیے جو انسانی جانوںکے زیاں کے سبب خوف وہراس میں ہیں۔ انہوںنے کہا کہ جموں و کشمیر کو مرکز کی حکومت کی طرف سے بدانتظامی اور ناقص حکمرانی سے دوچار کیا گیا ہے، موجودہ سیکورٹی صورتحال، بڑھتی ہوئی بے روزگاری، معاشی بحران کے خوف کی وجہ سے لوگوں کے دل ودماغ میں خوف ہے۔ میر نے مرکزی حکومت سے کہا کہ وہ گہری نیند سے باہر آئے اور جموں و کشمیر کے لوگوں کے تئیں اپنی پالیسی کو تبدیل کرے، اس کے علاوہ سیکورٹی، اقتصادی بحران، بے روزگاری کی بلند ترین شرح اور کشمیر کے ساتھ ساتھ لوگوں کو درپیش دیگر مسائل کے بارے میں لوگوں کے خدشات کو دور کرے۔انہوںنے کہاکہ مرکز کی غلط پالیسیوں کی وجہ سے جموں و کشمیر کے لوگ کب تک بھگتیں گے، جموں و کشمیر میں جمہوری حقوق کب بحال ہوں گے؟اس موقعہ پر جے کے پی سی سی کے نائب صدر عبدالرشید ڈار، ترجمان بشیر احمد ماگرے، گلزار احمد وانی ، جنرل سکریٹری سریندر سنگھ چنی، ڈی سی سی صدر عمر جان، مہیلا نائب صدر شمیمہ رینہ، جاوید ماگرے اور دیگر رہنماؤں نے بھی خطاب کیا ۔

 

 

 

 سرینگر//اقوام متحدہ میں بھارت کے مستقل مشن میںکونسلر،قانونی مشیر ڈاکٹر کاجل بٹ نے پاکستان پر جموں کشمیر میں تخریب کاری کو بڑھاوادینے کا الزام عائد کیا ہے۔ ڈاکٹر کاجل بٹ نے کہا کہ پاکستان جموں کشمیر میں بھارت کے خلاف درپردہ جنگ جاری رکھے ہوئے ہیں اوراگر اسلام آباد چاہتا ہے کہ دونوں ممالک کے درمیان بات چیت ہواس کیلئے پاکستان کو’’انتہا پسندی ‘‘سے پاک ماحول بنانا ہوگا۔کرنٹ نیوز آف انڈیا کے مطابق ڈاکٹر کاجل بٹ نے ہندوستان نے اقوام متحدہ میں اس کے خلاف جھوٹے اور بدنیتی پر مبنی پروپیگنڈے کیلئے پاکستانی کی سرزنش کرتے ہوئے کہا کہ دونوں ممالک کے درمیان بات چیت اسی وقت ممکن ہے جب پاکستان انتہا پسندی سے پاک ماحول بنائے۔انہوں نے کہا کہ ہندوستان پاکستان کے ساتھ ساتھ اپنے ہمسایہ ممالک کے ساتھ اچھے تعلقات استوار کرنا چاہتا ہے۔ شملہ معاہدے اور لاہوراعلامیہ کے مطابق اگر کوئی مسائل ہیں تو اس کا دوطرفہ اور پرامن طریقے سے حل نکالنے کے لئے پرعزم ہے۔ انہوں نے کہا کہ پاکستان کے ذریعہ ایک بارپھر ہندوستان کے خلاف اس پلیٹ فارم سے جھوٹا پروپیگنڈا کیا جا رہا ہے۔ پاکستان دنیا کی توجہ اپنی حقیقی صورتحال سے ہٹانا چاہتا ہے جہاں انتہا پسندی حاوی ہے اور وہاں اقلیتی برادری کے لوگوں کارہنامشکل ہو رہا ہے۔ 

 

 

 

 سرینگر //حکومت نے محکمہ پی ڈی ڈی میں انچارج سپرانڈنڈنٹ انجینئروں اور ایگزیکٹو انجینئروں کو ترقی دینے کے احکامات صادر کئے ہیں ۔جمعرات کو جاری کئے گے حکم نامہ زیر نمبر 187.JKPDDتاریخ 18نومبر 2021میں بتایا گیا ہے کہ محکمہ کے 32 انچارچ سپرڈنڈنٹ انجیروں کو ترقی دے کر سپرانٹنڈنٹ انجینئر بنائے گئے جبکہ 59ایگزیکٹیو انجینئروں کو بھی ترقی دی گئی ہے۔ انچارج سپرانٹنڈنٹ انجینئروںمیں مکھن لال کھجوریہ ، شمشیر سنگھ ، طارق مسعود شائق ، مسعود احمد بنگی ، اے کے فاتیدار ، گل اعیاز ، شاناز گونی ، مہراج کرشن مارکو ، ظہور احمد بٹ ، اشوق کمار کول ، حفیظ الرحمان ، بنیش چندر سندر ، محمد یاسین ملک ، رتن لال کوتوال ، ستیش کمار موزہ ، انیل کمار گپتا ، کرشن لال بٹ ، گرجہ کول جلالی ، ششی بوشن شرما ، عبدلمجید کاملی ، یو ایس ابرول ، خورشید احمد بڈو ، محمد سبحان کھانڈے ، سبھاش چندر ، سیدہ بانو ، سوم راج ، شوباش رام ، کلدیب کرشن رانا ، مشتاق احمد فتح خان ، سید فیاض اندرابی ، سرندر کمار کول اور محمد اکبر شیخ شامل ہیں ۔ ترقی پانے والے ایگزیکٹیو انجینئروں میں عبدلکریم رگو ، محمد یعقوب میر ،  محمد یعوب میر ، ارجن کمار ، پرویز احمدوادرے ،ورندر کمار ، مہراج کرشن وارکو ، تربون کرشن وارکو ، غلام حسن نجار ، نثار احمد زرگر ، گوتم کولی ، وجے کمار ڈبگوترہ ، مدن لال سرنگال ، ظہور احمد بٹ ، اشوق کمار کول فیض الرحمان ، بیس چند سدھن سمیت دیگر ایگزیکٹو افسران شامل ہیں ۔

 

 

 

 

 

 

جموں//ڈیزاسٹر منیجمنٹ ، ریلیف ، بحالی اور تعمیر نو ( ڈی ایم آر آر آر ) کے سیکریٹری ناظم زیڈ خان نے محکمے کی پیش رفت کا جائیزہ لینے کیلئے ایک میٹنگ طلب کی ۔ میٹنگ کے دوران ڈی ایم آر آر آر کے محکمہ کے افسران کو ہدایت دی گئی کہ وہ ای آفس کو اپنائیں اور سرکاری ریکارڈ کو ڈیجٹائیز کریں تا کہ عام لوگوں تک خدمات کی فراہمی کو بہتر بنایا جا سکے ۔ سیکریٹری ڈی ایم آر آر آر نے کشمیری تارکین وطن کے ساتھ ساتھ بے گھر افراد ( پی او جے کے ) ڈبلیو پی آر کے مضبوط /قابل تصدیق ڈیٹا بیس کی تخلیق پر متاثر کیا تا کہ میراثی ڈیٹا کی شفافیت اور حفاظت کو یقینی بنایا جا سکے ۔ مزید براں سینئر کنسلٹینٹ اور کنسلٹنٹس کو ڈیزاسٹر رسک ریڈکشن کیلئے سینڈائی فریم ورک کے تحت 115 میں سے خطرے کے شکار اضلاع کے ڈسٹرکٹ ڈیزاسٹر منیجمنٹ اتھارٹیز ( ڈی ڈی ایم ایز ) کو مضبوط بنانے ، پسماندہ اضلاع کی نشاندہی ، ایمر جنسی رسپانس سپورٹ سسٹم کو فوری طور پر ضروری دستاویزات فراہم کرنے کی ہدایت دی گئی ۔ سیکرٹری ڈی ایم آر آر آر نے اس بات پر زور دیا کہ پی ایم ڈی پی کے تحت وادی کشمیر میں پی ایم پیکج کے ملازمین کیلئے ٹرانزٹ رہائش کی تعمیر محکمے کا ایک باوقار پروجیکٹ ہے اور اس پروجیکٹ کو مقررہ مدت میں مکمل کرنے کیلئے عمل آوری ایجنسیوں کو اپنا طریقہ کار تیار کرنے کی ضرورت ہے ۔ میٹنگ کے دوران للت بھٹ ڈپٹی ڈائریکٹر ( پلاننگ ) ڈی ایم آر آر آر نے پاور پوائینٹ پریزنٹیشن دی ۔ ریلیف اور بحالی کمشنر ( ایم ) ، خصوصی سیکرٹری ڈی ایم آر آر آر ، ڈائریکٹر فائنانس ڈی ایم آر آر آر ، چیف انجینئر پی ڈبلیو ڈی /پی ایچ ای /پی ڈی ڈی ، انتظامی افسر ، ایف سی آر ، سینئر کنسلٹنٹ ، کنسلٹنٹ ، اسسٹنٹ ڈائریکٹر آر آر سی ایم کے علاوہ دیگر اصحاب نے شرکت کی ۔ 

 

 

 

محمد تسکین

بانہال// بانہال سے قریب چار کلومیٹر دور چاپناڑی علاقے میں اڑھائی سالہ بچہ گھر کے نزدیک بنے ایک چھوٹے سے تالاب میں گر کرغرقآب ہوگیا۔ مہلوک بچے کی شناخت سمت سنگھ ولد بہادر سنگھ ساکنہ چاپناڑی کے طور کی گئی ہے اور وہ سابقہ سرپنچ چون سنگھ کا پوتا تھا۔ مہلوک بچے کے رشتہ داروں نے کشمیر عظمی کو بتایا کہ جمعرات کی صبح چائے کے بعد گھر میں ماں اور گھر کے اس اکلوتے بیٹے کی بہنیں اور والدہ موجود تھیں جبکہ ان کا والد ٹرک ڈرائیور بہادر سنگھ ٹرک لیکر سرینگر نکل گیا تھا ۔ انہوں نے کہا کہ یہ بچہ گھر کے صحن میں کھیل رہا تھا اور اس دوران وہاں بنائے گئے ایک چھوٹے سے تالاب میں مگ لیکر پانی نکالنے کی کوشش کے دوران گر گیااور بہنوں نے ماں کو اطلاع کی لیکن تب تک بچے کی موت واقع ہوگئی تھی۔اگرچہ بچے کو فوری طور پر بانہال ہسپتال لایاگیا تاہم ڈاکٹروں نے اسے مردہ قرار دیا ۔ کئی سیاسی ، سماجی اور مذہبی جماعتوںنے حادثہ پر رنج و غم کا اظہار کرتے ہوئے غمزدہ خاندان سے ہمدردی کا اظہار کیا ہے۔

 

 

 

نیوز ڈیسک 

سرینگر //پریس کونسل آف انڈیا کی 3 رکنی ایف ایف سی ٹیم سرینگر پہنچ گئی اور وہ 5دنوں تک قیام کرے گی ۔ پریس کونسل آف انڈیا (پی سی آئی) کی فیکٹ فائنڈنگ کمیٹی (ایف ایف سی) کی ٹیم جمعرات کو جموں و کشمیر کے اپنے پانچ روزہ دورے پر سرینگر پہنچ گئی ہے جہاں وہ میڈیا برادری کے ساتھ خصوصی بات چیت کرے گی ۔یوٹی کا دورہ کرنے والی تین رکنی ٹیم میں پرکاش دوبے ممبر بی سی آئی اور گروپ ایڈیٹر دینک بھاسکر ، گربیر سنگھ، ممبرپی سی آئی اور ورکنگ جرنلسٹ 'دی نیو انڈین ایکسپریس' اور ڈاکٹر سمن گپتا، ممبر پی سی آئی اور ایڈیٹر جن مورچہ شامل ہیں۔ میڈیا برادری سے تعلق رکھنے والا کوئی بھی صحافی یا متعلقہ فرد جو ٹیم سے ملنا چاہتا ہو وہ اس سلسلے میں مزید معلومات کیلئے فون نمبرات  9419007064 اور 9906500058 پر رابطہ کر سکتا ہے۔ 

 

 

 

جاوید اقبال 

مینڈھر //مینڈھر سب ڈویژں کے کرشنا گھاٹی علاقہ میں سیکورٹی فورسز کی جانب سے متعدد دیہات کا محاصرہ کر کے تلاشی مہم کو شروع کر دیا گیا ہے ۔سیکورٹی ذرائع نے بتایا کہ ایک خفیہ اطلاع موصول ہوئی تھی جس کے تحت علاقہ میں تلاشی مہم شرو ع کی گئی ہے ۔انہوں نے بتایا کہ سرحد سے قریبی علاقہ و جنگلات میں مشکوک نقل و حرکت کی اطلاع موصول ہوئی تھی جس کے بعد ایس او جی اور فوج کی مشترکہ ٹیموں نے علاقہ کا محاصرہ کر لیا گیا ۔انہوں نے بتایا کہ اس تلاشی مہم کے دوران کرشنا گھاٹی لوہر ،منگلناڑ ،کہوڑیاں ودیگر ملحقہ دیہات اور جنگلا ت کا محاصرہ کیا گیا ہے ۔جمعرات کو شروع کیا گیا آپریشن آخری اطلاع موصول ہونے تک مسلسل چل رہا تھا۔

 

 

 

 

 

سمت بھارگو 

راجوری//راجوری ضلع میں کانگریس کے ایک سنیئر لیڈر نے پارٹی کے تمام عہدوں سے استعفیٰ دے دیا ہے ۔پارٹی سنیئر لیڈر کرامت اللہ ملک جو کہ پارٹی کے پہاڑی سیل کے وائس چیئر مین بھی ہے ،نے تمام عہدوں سے استعفیٰ دیتے ہوئے کہاکہ جموں وکشمیر اور راجوری ضلع میں پارٹی کے اندر جمہوری عمل کو مضبو ط بنانے کیساتھ ساتھ چند لیڈران کے تسلط کو ختم کیا جائے ۔کرامت اللہ ملک کا تعلق راجوری ضلع کے درہال علاقہ سے ہے جبکہ وہ جموں و کشمیر کیلئے پارٹی کے پہاڑی سیل کے وائس چیئرمین اور پردیش کانگریس کمیٹی کے رکن بھی تھے۔کشمیر عظمیٰ انہوں نے بتایا کہ ’وہ کانگریس پارٹی کے سرشار سپاہی ہیں اور رہیں گے اور پارٹی کی اقدار ان کے خون میں بہتی ہیں’لیکن موجودہ صورتحال خاص طور پر پارٹی میں انٹرا ڈیموکریسی سے متعلق ہے جس نے مجھے پارٹی عہدوں سے استعفیٰ دینے پر مجبور کیا۔انہوں نے کہا کہ کانگریس ملک کی سب سے پرانی پارٹی ہے اور اس کے پاس اب بھی ممکنہ قائدین ہیں جنہیں بین الاقوامی سطح پر تسلیم کیا جاتا ہے لیکن ورکنگ پارٹی اور اس کے کیڈر میں اصلاحات لانے کی ضرورت ہے۔موصوف نے کہاکہ پارٹی کے اندر جمہوریت کو مضبوط بنانا اشد ضروری ہے ۔انہوں نے کہاکہ’’پارٹی سب کیلئے ہے چند لوگوںکیلئے نہیں اور میں اس تسلط کے خلاف احتجاجاً تمام عہدوں سے استعفیٰ دے رہا ہوں لیکن ہمیشہ ایک سرشار سپاہی رہوں گا۔انہوں نے یہ بھی کہا کہ پارٹی کی کمان غلام نبی آزاد کے ہاتھ میں دینے کا وقت آ گیا ہے جنہوں نے پہلے ہی اپنی سیاسی صلاحیت کو ثابت کر دیا ہے اور بین الاقوامی سطح پر ایک تسلیم شدہ اور قابل تعریف شخصیت ہیں۔