عظمیٰ نیوز سروس
سرینگر//جموں و کشمیر کے وزیر اعلیٰ عمر عبداللہ نے منگل کو کہا کہ ماتا ویشنو دیوی میڈیکل کالج میں مسلم طلبا کو داخلے سے خارج کرنے کی تجاویز ان اصولوں کے خلاف ہیں جن پر یہ ادارہ قائم کیا گیا تھا۔جموں میں نامہ نگاروں سے بات کرتے ہوئے عمر نے کہا کہ NEET کے ذریعے کوالیفائی کرنے والے طلبا نے اپنی نشستیں حاصل کی ہیں اور انہیں مذہب کی بنیاد پر داخلے سے انکار نہیں کیا جا سکتا۔انہوں نے کہا کہ اگر کوئی گروہ یا سیاسی رہنما چاہتا ہے کہ کالج میں صرف ایک مخصوص کمیونٹی کے طلبا کو داخلہ دیا جائے تو ادارے کو قیام کے وقت ہی اقلیتی درجہ دیا جانا چاہیے تھا۔ عمر نے کہا، “جب یہ میڈیکل کالج قائم کیا گیا تھا، اگر مسلم طلبا کو باہر رکھنے کا ارادہ تھا، تو اس کی حیثیت کا اعلان اسی کے مطابق کیا جانا چاہیے تھا۔”انہوں نے کہا کہ طلبا تعلیم اور پیشہ ورانہ تربیت کے خواہاں ہیں اور مذہب ان کے کسی بھی ادارے میں تعلیم حاصل کرنے کے حق کو متاثر نہیں کرتا۔ انہوں نے کہا، جب بچے ماتا ویشنو دیوی کے نام سے منسوب کالج میں پڑھ رہے ہیں، تو وہ وہاں سیکھنے اور ڈاکٹر بننے کے لیے جا رہے ہیں۔بی جے پی لیڈر سنیل شرما کے حالیہ بیانات کا حوالہ دیتے ہوئے، عمر نے کہا کہ خارجی نقطہ نظر سماجی دوری کا باعث بن سکتا ہے اور بعد میں انہی برادریوں پر الزام عائد کیا جا سکتا ہے۔انہوں نے کہا، “اگر طلبا کو دور دھکیل دیا جاتا ہے اور بعد میں ان پر الگ تھلگ یا متاثر ہونے کا الزام لگایا جاتا ہے، تو ذمہ داری کو تسلیم کرنا چاہیے۔”انہوں نے مزید کہا کہ اگر کالج کو باضابطہ طور پر اقلیتی درجہ دیا جاتا ہے تو مسلم طلبا ملک سے باہر سمیت کہیں اور مواقع تلاش کریں گے۔عمر نے کہا، “اگر سٹیٹس کو تبدیل کیا جاتا ہے، تو انہیں دوسری جگہوں پر مواقع ملیں گے، یہاں تک کہ بنگلہ دیش یا ترکی میں، لیکن بعد میں ان پر الزام نہیں لگایا جانا چاہیے کہ وہ بنیاد پرست بن گئے ہیں،” ۔
