لاک ڈائون کا مُہیب سایہ گیلاس فصلوں پر

 سرینگر//وادی میں اس وقت چیری(گیلاس)کا سیزن جوبن پر ہے تاہم لاک ڈائون کے سبب مالکان باغات میوہ کو گراہکوں اور ڈیلروں تک نہ لے جانے سے لاکھوں روپے مالیت کا شاہ دانہ تباہ ہورہا ہے ۔ وادی کشمیر میں اس وقت گیلاس باغات میں تیار ہے اور مالکان باغات کو اس بات کی فکر ہے کہ لاک ڈائون کے سبب کوئی منڈی کھلی نہیں ہے اور نہ ہی ڈیلروں تک میوہ کو پہنچاسکتے ہیں۔  اس ضمن میں کئی مالکان باغات نے سی این آئی کوبتایاکہ شاہ دانہ جس کو عرف عام میں گیلاس کہا جاتا ہے ،اس وقت اس کا سیزن جوبن پر ہے اور یہ میوہ درختوں پر تیار ہے درختوں سے اُتارنے کے ساتھ ہی اس میوہ کو بازاروں تک پہنچانا ضروری ہوتا ہے تاکہ جلد سے جلد یہ گراہکوں تک پہنچے اور لوگ اس کے ذائقے سے لطف اندوز ہوں ۔لاک ڈاون کی وجہ سے رواں برس گیلاس کی صنعت بھی تباہ ہورہی ہے اور درختوں پر ہی یہ میوہ خراب ہورہا ہے ۔ تاجروں نے حکومت سے مطالبہ کیا ہے کہ وہ اس ضمن میں اقدامات کرکے اس شاہی پھل کو میوہ منڈیوں تک پہنچانے میں مدد کریں۔