ایم ایم پرویز
رام بن//سری نگر جموں قومی شاہراہ پر منگل کو رامسو کے قریب پتھر ہٹائے جانے اور بانہال کے شیربی بی کے قریب کشتواڑی پتھر میں بڑے پیمانے پر مٹی کے تودے گرنے کی وجہ سے سات گھنٹے تک گاڑیوں کی آمدورفت میں خلل پڑا۔حکام نے بتایا کہ قومی شاہراہ کو حسن باس، رامسو میں حکام کی سفارشات پر تقریباً دو گھنٹے تک بند رکھا گیا تاکہ لٹکے ہوئے پتھروں کو ہٹایا جا سکے جبکہ بانہال کے کشتواڑی پتھر، شیر بی بی علاقے میں بڑے پیمانے پر لینڈ سلائیڈنگ کی وجہ سے شاہراہ پانچ گھنٹے اور 21 منٹ تک ٹریفک کی نقل و حرکت کیلئے بندرہی۔ادھم پور میں ٹریفک کے ضابطے کی نگرانی کرنے والے ٹریفک حکام نے بتایا کہ دوپہر کو ٹریفک دوبارہ شروع کر دی گئی۔اس سے قبل پیر کی شام حکام نے اعلان کیا تھا کہ NH-44 پر گاڑیوں کی آمدورفت منگل کو صبح 2 بجے سے صبح 4 بجے تک پتھروں کو ہٹانے کے لیے معطل رہے گی تاہم ان کا کہنا تھا کہ صبح 4 بجے کے قریب کام مکمل کر لیا گیا تھا اور ٹریفک دوبارہ شروع ہو گئی تھی ۔رام بن میںٹریفک حکام نے منگل کی شام کو بتایا کہ سری نگر جموں قومی شاہراہ دونوں طرف ٹریفک کے لیے کھلی ہے۔ٹریفک حکام نے کہا کہ بہتر موسم اور سڑک کے اچھے حالات کے تحت بدھ کو جموں سری نگر قومی شاہراہ کے دونوں طرف ہلکی اور بھاری گاڑیوں کو چلنے کی اجازت ہوگی۔
