بشکیک (کرغزستان)// بھارت اور پاکستانی وزیر خارجہ کے درمیان اچانک غیر رسمی بات چیت ہوئی ہے۔ دونوں وزرائے خارجہ شنگھائی تعاون تنظیم (ایس سی او) کے سالانہ اجلاس کے لئے اس وقت کرغیزستان کے دارالحکومت بشکیک میں موجود ہیں۔ اس دوران شاہ محمود قریشی اور سشما سوراج ایس سی او وزرائے خارجہ کونسل کے اجلاس میں شرکت کے لیے ایک ہی وقت میں کانفرنس ہال پہنچے تو دونوں کے درمیان غیر رسمی بات چیت ہوئی۔آمنا سامنا ہونے پر دونوں وزرائے خارجہ نے رسمی طور پر ایک دوسرے کا حال احوال معلوم کیا۔اخبار ڈان کے مطابق اس حوالے سے ذرائع کا دعوی ہے کہ پاک بھارت وزرائے خارجہ کے درمیان رسمی بات چیت کے دوران تعلقات میں بہتری اور دو طرفہ مذاکرات پر مختصر گفتگو ہوئی جبکہ دونوں رہنماؤں نے بھارتی انتخابات کے بعد رابطے کا عندیہ بھی دیا۔ذرائع کے مطابق شاہ محمود قریشی نے سشما سوراج سے کہا کہ انتخابات کے بعد بھارتی رویے میں تبدیلی کی امید ہے جس کے جواب میں بھارتی وزیر خارجہ کہا کہ 'بہتری ہی کی امید رکھنی چاہیے'۔اجلاس کے بعد گروپ فوٹو کے دوران سشما سوراج نے پاکستانی ہم منصب کے برابر میں کھڑے ہونے کی کوشش کی جس کے بعد روسی وزیر خارجہ نے انہیں بتایا کہ وہ غلطی سے ان کی مختص کردہ جگہ پر کھڑی ہوگئیں جس کے بعد وہ وہاں سے چلی گئیں۔
قریشی سشما کی اچانک ملاقات
