فاروق خان نے پنڈت کالونی ویسو کا دورہ کیا | جنم اَشٹمی کے سلسلے میں منعقدہ ثقافتی پروگرام میں شرکت

کولگام//لیفٹیننٹ گورنر کے مشیر فاروق احمد خان نے منگل کو کے پی کالونی ویسو کا دورہ کیا ۔انہوں نے ویسو ویلفیئر کمیٹی کے زیر اہتمام ثقافتی پروگرام میں مہمان خصوصی کی حیثیت سے شرکت کی۔اِس موقعہ پر جنم اَشٹمی اور کرشن جی سے متعلق اَطفال اور چھوٹے بچوں نے گیت اور رقص کیا۔ اِس موقع پر کالونی کے مکینوں نے مشیر موصوف کو مختلف مسائل گوش گزار کئے جن میں ناکافی رہائش ، پرموشن اور وزیر اعظم پیکیج کے تحت تعینات ملازمین کی بین ضلعی منتقلی شامل ہے۔انہوں نے اَپنے وارڈوں کے لئے کے وی سکول کے قیام کا مطالبہ کیا۔ فاروق خان نے اَپنے خطاب میں بچوں کے ہنر کو سراہا ۔انہوں نے کہا کہ وقت کی ضرورت ہے کہ اِس ٹیلنٹ کو ٹیپ کیا جائے ۔انہوں نے کشمیر پنڈتوں کو سب سے آگے رہنے اور ان تمام لوگوں کو واپس لانے کے حکومت کے خواب کو سچ کرنے پر مبارک باد دی جو نوے کی دہائی کے اوائل میں وادی چھوڑ گئے تھے۔مشیر موصوف نے مزید کہا کہ حکومت ان تمام لوگوں کو واپس لانے کے لئے پُر عزم ہے۔اُنہوں نے لوگوں کی جانب سے اُٹھائے گئے مسائل اور مطالبات کو بغور سنا اور اُنہیں یقین دِلایا کہ ان کے تمام جائز مطالبات پر غور کیا جائے گا۔اُنہوں نے کے پی کالونی میں کے وی سکول کے قیام کے بارے میں کہا کہ اِس پر غور کیا جائے گا لیکن اُنہوں نے لوگوں کو مشورہ دیا کہ وہ اَپنے وارڈ پہلے سے قائم سکول میں بھیج دیں جہاں دیگر کمیونٹی کے بچے بھی تعلیم حاصل کر رہے ہیںتاکہ بھائی چارے کو برقرار رکھا جائے اور بچے وہی ماحول حاصل کریں جو 90 کی دہائی سے پہلے تھا۔دورے کے دوران مشیر کے ہمراہ ضلع ترقیاتی کمشنر کولگام ڈاکٹر بلال محی الدین بٹ ، ایس ایس پی کولگام گریندر پال سنگھ اور دیگر اَفسران بھی تھے۔