یو این آئی
جموں//صدر جمہوریہ ہند درو پدی مرمو اپنے دورہ جموں و کشمیر کے دوسرے دن جمعرات کو ریاسی کے قصبہ کٹرہ میں واقع ویشنو دیوی مندر پہنچی جہاں انہوں نے دوبارہ تعمیر شدہ پاروتی بھون اور 2 سو میٹر طویل سکائی واک کا افتتاح کیا۔اس موقع پر لیفٹیننٹ گورنر منوج سنہا بھی ان کے ہمراہ تھے۔ویشنو دیوی شرائن بورڈ کے چیف ایگزیکیٹو افسر (سی ای او) انشول گرگ نے صدر جمہوریہ کو ان دو پروجیکٹوں کے متعلق جانکاری فراہم کی۔بعد ازاں صدر مرمو نے ویشنو دیوی مندر میں پوجا بھی کی۔
صدر جمہوریہ کے دورے کے پیش نظر کٹرہ میں سیکورٹی کا سخت بندوبست کیا گیا تھا۔ سیکورٹی فورسز کی اضافی نفری کو تعینات کیا گیا تھا اور گاڑیوں وغیرہ کی تلاشی بھی کی جا رہی تھی۔حکام کا کہنا ہے کہ 2 سو میٹر طویل سکائی واک سے یاتریوں کا سفر آسان اور ہموار ہوگا۔انہوں نے کہا کہ 9.89 کروڑ روپیوں سے زیادہ کی لاگت سے تیار کی گئی اس سہولیت جو ٹریک کی سطح سے 20 فٹ اوپر ہے، یاتریوں کے کثیر جہتی بہائو اور منوکمنا بھون اور گیٹ نمبر 3 کے درمیان افرا تفری کی صورتحال پر قابو پانے میں مدد کرے گی۔ان کا کہنا ہے کہ سکائی واک کو یاتریوں کے بہائو کو کم کرنے اور بھون میں بھیڑ کے بہتر انتظام کو یقینی بنانے کے لئے بنایا گیا ہے۔حکام کے مطابق پاورتی بھون کو 15 کروڑ روپیوں کی لاگت سے مکمل طور پر سر نو تعمیر کیا گیا ہے اور یہ یاتریوں کے لئے ایک مفت سہولیت ہے۔انہوں نے کہا کہ اس کو سکائی واک کے ساتھ جوڑا دیا گیا ہے تاکہ اس بات کو یقیبنی بنایا جاسکے کہ یاتری اپنا سامان جمع کرانے کے بعد براہ راست مندر پر جا سکیں۔ان کا کہنا ہے کہ اس میں 15 سو لاکرز کی سہولیت دستیاب ہے۔انہوں نے سرینگر میں راج بھون کے آڈیٹوریم کے احاطے پر پگوڈا کا پودا لگایا۔لیفٹیننٹ گورنر منوج سنہا نے ‘ایکس’ پر ایک پوسٹ میں کہا: ‘راج بھون آڈیٹوریم کے احاطے میں پگوڈا کا پودا لگانے کے لئے درو پدی مرمو کے ہمراہ تھا’۔بتادیں کہ صدر جمہوریہ اپنے دو روزہ جموں و کشمیر کے لئے بدھ کے روز سری نگر پہنچیں جہاں انہوں نے کشمیر یونیورسٹی کے 20 ویں کنووکیشن سے خطاب کیا۔
