سرینگر//کشمیر میں بے دریغ شہری ہلاکتوں کے خلاف متحدہ مزاحمتی قیادت کے پروگرام کے تحت بڈگا م میں انجمن شرعی شیعیان کے اہتمام سے آغا سید عقیل کی قیادت میں احتجاجی جلوس برآمد کیا جبکہ تنظیم کے سربراہ آغا سید حسن کو علی الصبح خانہ نظر بند کیا گیا تھا جس کی وجہ سے وہ نماز جمعہ کی پیشوائی کے فرائض انجام نہ دے سکے۔ آغا سید عقیل نے نماز جمعہ کی پیشوائی کی اور بعد از نماز جمعہ وادی میں بھارتی فورسز کے ہاتھوں شہری ہلاکتوں کے پے در پے سانحات کے خلاف احتجاجی مظاہرہ کیا ۔ امام باڑہ حسن آباد میں بھی بعد از نماز جمعہ کے بعد انجمن شرعی کے اہتمام سے آغا سید عابد الحسینی کی قیادت میں شہری ہلاکتوں کے خلاف احتجاج کیا گیا ۔ مظاہرین نے بھارت کے ظلم وستم کے خلاف اور اسلام و آزادی کے حق میں نعرے بلند کئے ۔ ترجمان نے ریاستی ظلم و جبر اور بے دریغ شہری ہلاکتوں کی شدید الفاظ میں مذمت کرتے ہوئے کہا کہ کشمیریوں کے جذبہ آزادی کو ختم کرنے میں ناکامی کے بعد بھارت نے کشمیریوں کی نسلی صفائی کی مہم تیز کررکھی ہے۔ اس بے پناہ جبروبربریت کے باوجود کشمیری عوام اپنے پیدائشی حق خود ارادیت سے دستبردار نہیں ہونگے۔ ترجمان نے آغا سید حسن اور دیگر مزاحمتی قائدین کی خانہ نظر بندیوں کی پُرزور الفاظ میں مذمت کی۔ ترجمان نے کہا کہ آزادی پسند قیادت کو گھروں میں مقید کرنے سے عوام کا جذبہ مزاحمت متاثر نہیں ہوسکتا۔
شہری ہلاکتوں کیخلاف بڈگام میں احتجاجی جلوس
