سرینگر /پولیس کی جانب سے جاری ایک بیان میں منگل کو بتایا گیا کہ بارہمولہ پولیس نے ضلع کے کوہاربالہ جنگلی علاقے میں اپنی ہی بیٹی کا قتل کرنے والے باپ کو گرفتار کیا ہے۔
پولیس بیان کے مطابق جاوید احمد خان ولد رحمت ا للہ خان ساکنہ لرہ ڈورہ نامی اس شخص نے جنگلی علاقے میں اپنی بیٹی کا قتل کیا اور بعد میں اس کی لاش کو جنگل میں ہی ٹھکانے لگایا۔
پولیس نے پولیس سٹیشن چندوسہ میںمعاملے کی نسبت ایف آئی آر درج کرکے تحقیقات شروع کی ہے۔
پولیس بیان کے مطابق تفتیش کے دوران تحقیقاتی آفیسران کو معلوم ہوا ہے کہ جاوید خان نے اپنی بیٹی کو نزدیکی جنگل پہنچایا اور وہاں باپ بیٹی کے درمیان شادی طے کرنے پر بحث و تکرار ہوئی اور اس معاملے پر اتفاق نہ ہونے کے باعث والد نے طیش میں آکر اپنی بیٹی کا بے دردی کے ساتھ قتل کیا ۔ملزم کی گرفتاری عمل میں لا کر اس کے خلاف قانونی چارہ جوئی کا آغاز کیا گیا ہے۔ فارینسک ماہرین نے جائے واردات کا معائنہ کیا ہے اور وہاں سے ثبوت وشواہد اکھٹے کئے ہیں۔
