عظمیٰ نیوز سروس
سرینگر// میرواعظ کشمیر ڈاکٹر مولوی محمد عمر فاروق نے کل تاریخی جامع مسجد سری نگر میں جمعہ کے اجتماع سے خطاب کرتے ہوئے، جاری امرناتھ یاترا کے پیش نظر شراب کی دکانوں کو نیشنل ہائی وے سے پانتہ چھوک کے رہائشی علاقوں میں منتقل کرنے کے مبینہ اقدام کی شدید مذمت کی۔میرواعظ نے کہا کہ علاقے کے ایک وفد نے مجوزہ نقل مکانی پر اپنی شدید تشویش اور غم و غصہ کا اظہار کیا۔ یہ گنجان آباد رہائشی علاقوں میں خاندان، اسکول، مساجد، تعلیمی اور مذہبی ادارے اور عوامی مقامات ہیں۔ شراب کی دکانوں کو اپنے اطراف میں منتقل کرنے سے علاقے کے سماجی اور اخلاقی تانے بانے بری طرح متاثر ہوں گے، جو کہ لوگوں کے لیے بالکل ناقابل قبول ہے۔میرواعظ نے کہا کہ یہ فیصلہ انتہائی پریشان کن اور ناقابل قبول ہے۔ انہوں نے حکام پر زور دیا کہ وہ ایسے فیصلوں کو نافذ کرنے کے بجائے لوگوں کی بات سنیں جو جموں و کشمیر کے لوگوں کے مذہبی اقدار اور مشترکہ اقدار کے نظام کی خلاف ورزی کرتے ہیں۔
