یو این آئی
سرینگر// وادی کشمیر میں موسم خشک ہونے کے نتیجے میں شبانہ درجہ حرارت میں بتدریج گراوٹ درج ہو رہی ہے، اور درجہ حرارت منفی چلا گیا ہے۔ماہر موسمیات فیضان عارف کا کہنا ہے کہ وادی میں شبانہ درجہ حرارت میں بتدریج کمی واقع ہوسکتی ہے۔انہوں نے کہا ‘گرچہ کمزورمغربی ہوا کے داخل ہونے کے پیش نظر دو تین دنوں کے دوران مطلع ابر آلود رہنے کے باعث شبانہ درجہ حرارت قدرے بہتر ہونے کی امید ہے تاہم بعد ازاں اس میں ایک بار پھر کمی درج ہوسکتی ہے’۔ان کا کہنا تھا کہ وادی میں گذشتہ چار برسوں کے مقابلے میں امسال اکتوبر اور نومبر کے مہینوں میں موسم بہتر رہا۔موصوف نے کہا کہ اس برس بھی ماہ نومبر میں بارشیں اور پہاڑی علاقوں میں برف باری ہوئی لیکن اس کے باوجود بھی گذشتہ برسوں کے مقابلے میں موسم اچھا ہی رہا۔انہوں نے کہا کہ وادی میں جاری موسمی صورتحال کے پیش نظر سال رواں کے آخر تک موسم مجموعی طور پر خشک رہنے کا امکان ہے۔ان کا کہنا تھا کہ ا گرچہ 23 اور 24 نومبر اور پھر 27 نومبر کو کمزور مغربی ہوائیں وارد ہوسکتی ہیں لیکن شاید ان کے زیر اثر میدانی علاقوں میں برف باری نہیں ہوسکتی ۔ وادی کا شبانہ درجہ بتدریج کم ہو رہا ہے۔ سرینگر میں گذشتہ شب اس موسم کاکم سے کم درجہ حرارت 0.0 ڈگری ریکارڈ کیا گیا ۔ قاضی گنڈ میں بھی 0.0 جبکہ اننت ناگ میں منفی 1.6 ، پلوامہ میں منفی 2.0 ، شوپیان میں منفی 3.6 ، بڈگام میں منفی1.0 ، بارہمولہ میں 0.6 ، بانڈی پورہ میں منفی0.1 ریکارڈ کیا گیا۔محکمہ موسمیات کے ایک ترجمان کے مطابق وادی کشمیر میں اگلے ایک ہفتے کے دوران موسم وسیع پیمانے پر خراب ہونے کا کوئی امکان نہیں ہے۔انہوں نے کہا کہ وادی میں 18 نومبر سے 26 نومبر موسم مجموعی طور پر خشک رہنے کا امکان ہے تاہم اس دوران 18 اور 25 نومبر کو مطلع ابر آلود رہ سکتا ہے۔