عظمیٰ نیوز سروس
سرینگر// آل اِنڈیا فٹ بال فیڈریشن نے جموں و کشمیرسپورٹس کونسل کی فٹ بال اکیڈیمی کی نوجوان ٹیلنٹ کو پروان چڑھانے اور جموںوکشمیر میں نچلی سطح پر فٹ بال کی ترقی کو فروغ دینے کی غیر معمولی کوششوں اور لگن کو تسلیم کرتے ہوئے اکیڈمی کو 2023-24 ء کے لئے بہترین گراس روٹ سینٹر ایوارڈ سے نوازا ہے۔ اے آئی ایف ایف نے جے کے ایس سی کی فٹ بال اکیڈیمی کو اے آئی ایف ایف بلیو کیبز ڈیولپمنٹ سینٹر اَقدام کے لئے بھی منتخب کیا ہے جو نچلی سطح پر فٹ بال ٹیلنٹ کو فروغ دینے پر توجہ مرکوز کرتے ہوئے اکیڈمی کی سرگرمیوں اور کامیابیوں کو مزید بہتر کرے گا۔2017 میں قائم کی گئی جموں و کشمیر سپورٹس کونسل فٹ بال اکیڈیمی ہر سال آئی ایس ایل اور آئی لیگ ٹیموں کے لئے کھلاڑی تیار کرتی ہے۔ اِس کے علاوہ 13 کھلاڑی جن میں ساحل خورشید، جہانگیر، محیط شبیر، عبدالصالحہ، رشی راجپوت، سجاد حسین، سہیل احمد اور کئی دیگر شامل ہیںاور مختلف عمر کے گروپوں میں اِنڈین نیشنل ٹیموں کی نمائندگی کر چکے ہیں۔ فی الحال 1,500 سے زیادہ خواہشمند فٹ بال کھلاڑی پورے جموں و کشمیر میں پھیلے 12 کھیلو اِنڈیا فٹ بال مراکز اور 13 جے کے ایس سی اکیڈیمی ضلع یونٹوں میں کوچنگ حاصل کر رہے ہیں۔ اِس کے علاوہ سری نگر اور جموں کے جے کے ایس سی فٹ بال سکول میںچھوٹے بچے بھی بڑی تعداد میں کھیل کی طرف توجہ حاصل کرتے ہیں۔سیکرٹری محکمہ اَمورنوجوان و کھیل کود سرمد حفیظ نے اِس شاندار کامیابی پر اکیڈیمی کے کوچوں، عملے اور ٹرینروں کو سراہا۔ اُنہوں نے کہا کہ لیفٹیننٹ گورنر منوج سِنہاکی ہدایت پر جموں و کشمیر میں کھیلوں کو زبردست فروغ ملا ہے جو جے کے ایس سی کے صدر بھی ہیں۔سیکرٹری جے کے ایس سی نزہت گل نے کہا کہ فٹ بال خطے میں سب سے زیادہ مقبول کھیل ہے۔ اِس طرح اَقدامات سے ہمارا مقصد ہے کہ ہمارے زیادہ سے زیادہ فٹ بالرز مستقبل میں جموںوکشمیر یو ٹی اور ملک کا نام روشن کریں۔
