عظمیٰ نیوز سروس
سرینگر//لالچوک میں لگائے گئے سماررٹ سنڈے مارکیٹ کے دوران اگرچہ دوپہر تک لوگوں کی کی خاصی چہل پہل اور بھر پور خریداری کا مشاہدہ کیا گیا تاہم دوپہر کے بعد بھارت اور پاکستان کے درمیان ایشا کپ کے سپر فور کرکٹ مقابلے کی شروعات کے بعد ہی بازار کا رش مدھم پڑ گیا اور دن ڈھلتے ڈھلتے خریداری رک گئی۔سنڈے مارکیٹ کے ذمہ داران نے بتایا کہ آج حسب توقع دوپہر تک ہی اچھی خریداری ہوئی تاہم بھارت پاکستان کرکٹ مقابلے کی شروعات کے بعد لوگوں کا آنا کم ہوگیا۔ابتداء میں مقامی لوگوں کے علاوہ بیرونی سیاحوں نے بھی آکر خریداری سے لطف اٹھایا اور اپنے مس پسند چیزوں کا انتخاب کیا۔گھنٹہ گھر کے نزدیک کشمیری آرٹ اشیاء خریدنے میں مصروف احمد آباد کے ایک جوڑے نے بتایا کہ وہ لالچوک میں سنڈے مارکیٹ آکر بہت خوشی محسوس کررہے ہیں۔انہوں نے کہاکہ ایک تو کشمیری آرٹ کی خریداری اور وہ بھی نسبتا کم ریٹ میں یہاں دستیاب ہیں۔ابتدائی اوقات میں لالچوک کے گھنٹہ گھر کے آس پاس سیاحوں کا خاصا تانتا بندھا رہا اور جم کر خریداری بھی کی۔اس دوران ٹی آر سی کراسنگ ،پولو ویو ،ریگل چوک اور مکہ مارکیٹ میں بھی اتوار کی صبح اور دوپہر تک سنڈے مارکیٹ آب و تاب کے ساتھ جاری رہا لیکن دن ڈھلتے ہی لوگوں کا رش کم ہونا شروع ہوا۔کئی چھاپڑی فروشوں نے کہاکہ یہ بھارت پاکستان کرکٹ میچ کی وجہ سے ہے۔ایسا پہلے بھی ہوتا رہا ہے۔تاہم ان کا کہنا تھا کہ عمومی طور ابتدائی اوقات میں بھی آج کا سنڈے مارکیٹ بہتر کمائی کرپایا۔انہوں نے امید ظاہر کی ہے آگے بھی سنڈے مارکیٹ کو اسی طرح سجنے اور اسے ایک منافع بخش کاروباری سرگرمی بنانے میں سرکار توجہ دے گی۔
