کنگن //کھٹوعہ سانحہ میں ملوث افراد کو کیفر کردار تک پہنچانا سرکا ر کی اولین ترجیحات میں شامل ہے اور اس ضمن میں کسی بھی جماعت کو سیاست کرنے کا موقعہ فراہم نہیں کیا جائے گا۔ ان باتوں کا اظہار پیپلز ڈیموکریٹک پارٹی کے جنرل سیکریٹری پیر زادہ منصورحسین نے کنگن میں عوامی جلسہ سے خطاب کے دوران کیا۔ انہوں نے کہاکہ تحقیقاتی عمل پوری شدت سے جاری اور ساری ہے اور اسکی نگرانی خود وزیر اعلیٰ محبوبہ مفتی کر رہی ہیں۔ سیاسی جماعتوں سے کھٹوعہ سانحہ پر سیاست نہ کرنے کی ایپل کرتے ہوئے پیرزادہ منصور کا کہنا تھا کہ جس کسی فرد نے بھی ایسی گھناونی حرکت سر انجام دی ہے ، اُسے کیفر کردار تک پہنچانا سرکار اپنا فرض العین سمجھتی ہے۔ انہوں نے کہا کہ جموں وکشمیر مذہی رواداری اور ہم آہنگی کے لئے پورے عالم میں اپنا مخصوص مقام حاصل کئے ہوئے ہیں اور اس پہچان کو قائم و دوائم رکھنا ریاست جموں وکشمیر کے ہر فرد کی ذمہ داری ہے۔ حزب اختلاف نیشنل کانفرنس کو تنقید کا نشانہ بناتے ہوئے پیر زادہ منصور نے کہا کہ دھوکہ دہی اور سراب کی سیاست اس جماعت کی اولین پہنچان رہی ہے۔ انہوں نے کہا کہ اگر آج مسئلہ کشمیرکی وجہ سے عوام جانی و مالی نقصانات سے دوچار ہو رہے ہیں تو اسکی ذمہ دار نیشنل کانفرنس کی وہ دوغلی سیاست ہے ، جس نے کشمیریوں کو ہر وقت اہم موڑ پر لاکر فریب سے کام لیا۔ انہوں نے کہاکہ 1946کی کشمیر چھوڑ دو تحریک سے لیکر 1947کے الحاق تک نیشنل کانفرنس نے فقط ایک سال کے عرصے میں اپنا موقف تبدیل کر دیا اور پھر 1953میں رائے شماری کا لبادہ اوڑے 1975تک کشمیری عوام کو گمراہ کیا۔ وزیرا عظم کے عہدے کو وزیر اعلیٰ کے عہدے میں تبدیل کرنے میں بھی فقط نیشنل کانفرنس ہی ذمہ دار ہے۔ پیر زادہ منصور نے کہاکہ اسکے برعکس پی ڈی پی بانی مفتی محمد سعید (مرحوم) جو کہ دلی میں اہم عہدوں پر فائز رہ چکے ، نے راہ مشکل اختیار کرکے کشمیری عوام کو سیاسی غیر استحکام کے دلدل سے نجات دلانے کیلئے شدومد سے کوششیں کیں ۔ ہندوستان اور پاکستان کو دوستانہ ماحول قائم کرنے کی اپیل کرتے ہوئے پیر زادہ منصور حسین نے کہا کہ ان دونوں ممالک کی تلخیوں کا نتیجہ ہر وقت جموں وکشمیر کے عوام کو بھگتنا پڑتا ہے اور وقت آچکا ہے جب یہ دونوں ممالک دوستانہ ماحول قائم کرکے ریاست جموں وکشمیر کو امن وامان کا وہ پُل بنائیں جسے بر صغیر میں ایک بار پھریکجہتی ،مذہبی رواداری اور محبت کی راہیں مستحکم ہو سکے۔سونہ مرگ کو سیاحت کا ایک اہم مقام قرار دیتے ہوئے جدید طرز پراز سر نو دلکش بنانے کی یقین دہانی کرتے ہوئے انہوں نے کہا کہ مخلوط سرکار وعدہ بند ہے کہ اس سیاحتی مقام کو ریاست کے سیاحتی نقشے پر ایک اہم مقام حاصل ہو۔ سرینگر ضلع صدر اور ایم ایل سی محمدخورشید عالم نے کہا کہ پی ڈی پی اک واحد ایسی جماعت ہے کہ جس نے عوام کی بقاء اور انکے جان و مال کے تحفظ کو اپنا نصب العین سمجھا ہے اور عوام کو سیاسی سماجی اور اقتصادی بدحالی سے بچانے کی خاطر تن دہی سے کام کر رہی ہے۔جلسے سے ضلع صدر گاندربل بشیر احمد میر ، پی ڈی پی لیڈر نذیر احمد اور دیگر لیڈران نے بھی خطاب کیا۔
سرکارکھٹوعہ سانحہ میں ملوث افراد کو کیفر کردار تک پہنچا کر ہی دم لے گی:منصور حسین
