کراچی/برازیل کے فٹبال اسٹار رونالڈینو نے عزت افزائی پر سابق پاکستانی کپتان شاہد خان آفریدی کا شکریہ ادا کرتے ہوئے کہا ہے کہ وہ دورہ پاکستان کے لیے پرجوش ہیں۔بوم بوم آفریدی نے چند روز قبل رونالڈینو کی پاکستان آنے کی خبروں پر خوشی کا اظہار کرتے ہوئے انھیں خوش آمدید کہا تھا۔رونالڈینو نے اپنے ٹوئٹر پیغام میں کہا کہ انہیں شاہد آفریدی کے پیغام سے بہت خوشی ہوئی، بوم بوم پاکستان کرکٹ کے ہیرو ہیں اور انہیں یقین ہے کہ جب وہ پاکستان آئیں گے تو ان کا زبردست انداز میں خیرمقدم کیا جائے گا۔یاد رہے کہ دو مرتبہ فیفا پلیئر آف دی ایئر کا ٹائٹل جیتنے والے رونالڈینو نے گذشتہ دنوں اپنے ٹوئٹر اکاؤنٹ کے ذریعے اپنے دورہ پاکستان کی تصدیق کی اور پاکستانیوں کو مخاطب کرتے ہوئے کہا کہ 'پاکستان میں آ رہا ہوں'۔رپورٹس کے مطابق رونالڈینو پاکستان میں ایک نمائشی میچ کھیلیں گے جس کے لیے ان کا منتظمین سے معاہدہ ہوگیا ہے۔رونالڈینو نے 2004 اور 2005 میں فیفا کے بہترین فٹبال پلیئر آف دی ایئر کا ایوارڈ اپنے نام کیا تھا۔وہ 97 میچز میں برازیل کی نمائندگی کرچکے ہیں اور 2002 میں ورلڈکپ وننگ ٹیم کا حصہ تھے جب کہ اس کے علاوہ رونالڈینو دنیا بھر کی لیگز میں بھی کھیل رہے ہیں۔
یاد رہے کہ کچھ ماہ پہلے برازیل کے کوچ رمیلڈو سانچیز نے بھی لیاری کا دورہ کرکے بچوں کو فٹبال کے گر سکھائے تھے۔
