بلال فرقانی
جموں//حکومت نے منگل کو توش خانہ ونگ کو ختم کرنے اور اس کے اثاثوں اور عملے کو محکمہ ثقافت کو منتقل کرنے کے بارے میں باضابطہ احکامات جاری کیے ہیں۔ایک سرکاری حکم نامے میں کہا گیا ہے “جموں و کشمیر توشخانہ آرگنائزیشن کو بند کرنے / ختم کرنے کی منظوری دی گئی ہے” ۔توش خانہ کی منظور شدہ اسامیاں اور موجودہ عملے کو محکمہ ثقافت میں منتقل کر دیا گیا ہے۔حکم میں مزید کہا گیا کہ “جموں/کشمیر میں توشخانہ کے تمام ریکارڈ اور غیر منقولہ/منقولہ اثاثے بھی محکمہ ثقافت کو منتقل کیے گئے ہیں‘‘۔توش خانہ’ میں جموں و کشمیر کے سابق ڈوگرہ حکمرانوں کے شاہی تحائف اور قدیم اشیاء موجود ہیں۔ جموں میں، توش خانہ کے اثاثے مبارک منڈی ہیریٹیج کمپلیکس میں محفوظ کیے گئے ہیں، جب کہ سرینگر کے صدر ٹریجری کے ایک لاکر میں رکھے گئے ہیں۔توش خانہ کے انتظامی کنٹرول کو محکمہ ثقافت کو منتقل کرنے کا فیصلہ 13 اگست کو لیفٹیننٹ گورنر منوج سنہا کی سربراہی والی انتظامی کونسل نے کیا تھا۔ حکومت کے مطابق، یہ فیصلہ محکمہ ثقافت کے تحت آرکائیوز، آثار قدیمہ اور عجائب گھروں کے ساتھ اس کے کام کاج کو ہم آہنگ کرے گا اور شہری اپنے ورثے کے بارے میں بہتر معلومات حاصل کر سکیں گے۔
