عظمیٰ نیوز سروس
سرینگر//محکمہ موسمیات نے جمعہ کی شام جموں و کشمیر کے بالائی علاقوں میں ہلکی بارش اور برف باری جبکہ اگلے کئی دنوں تک موسم عام طور پر خشک رہنے کی پیش گوئی کی ہے۔ ڈائریکٹر محکمہ موسمیات ڈاکٹر مختار احمد نے بتایا کہ شام تک چند مقامات پر ہلکی بارش یا برفباری کا امکان ہے۔انہوں نے مزید کہا کہ 11 سے 19 اکتوبر تک مرکز کے زیر انتظام علاقوں میں موسم عام طور پر خشک رہنے کی توقع ہے اور اس مدت کے دوران موسم کی کوئی بڑی سرگرمی متوقع نہیں ہے۔انہوں نے کہا کہ اب راتیں دن بہ دن سرد ہوتی جائیں گی اور صبح کے اوقات میںسردی کی شدت زیادہ رہے گی۔ انکا کہنا تھا کہ دن کے اوقات میں اچھی دھوپ نکلے گی لیکن آہستہ آہستہ اسکی شدت میں بھی کمی آئے گی۔ڈائریکٹر نے مزید کہا کہ اکتوبر کا مہینہ عمومی طور پر خشک رہتا ہے اور موسمی صورتحال بھی اسکی عکاسی کررہا ہے۔ایک ایڈوائزری میں محکمہ نے کسانوں پر زور دیا کہ وہ تمام زرعی سرگرمیاں جاری رکھیں کیونکہ آنے والے دنوں میں موسمی حالات فیلڈ آپریشنز کے لیے سازگار رہنے کا امکان ہے۔محکمہ موسم کی پیشرفت کی نگرانی کرتا رہے گا اور ضرورت کے مطابق اپ ڈیٹ جاری کرے گا۔
