نئی دہلی/عظمیٰ نیوز سروس/ ایک مقامی عدالت نے جمعہ کو حزب المجاہدین کے گرفتار مشتبہ ملی ٹینٹ کو جموں و کشمیر میں دہشت گردی کے 11 واقعات میں ملوث ہونے کی پاداش میں 7 دن کی پولیس حراست میں بھیج دیا۔دہلی پولیس کے اسپیشل سیل نے جمعرات کو جاوید احمد متو (32) کو قومی دارالحکومت سے گرفتار کیا۔چیف میٹرو پولیٹن مجسٹریٹ نبیلہ ولی نے متو کو عدالت میں پیش کرنے کے بعد دہلی پولیس کی طرف سے داخل کی گئی درخواست پر ایک ہفتے کے لیے حراست میں بھیج دیا۔دہلی کے نظام الدین علاقے سے ملزم،جس پر 10 لاکھ روپے کا انعام تھا، کو گرفتار کیا گیا۔ پولیس نے بتایا کہ جب اسے پکڑا گیا تو وہ چوری کی کار چلا رہا تھا۔پولیس نے بتایا کہ متو کا نام “دہشت گردی کے 11 معلوم مقدمات” میں ملوث ہے، جس میں جموں اور کشمیر میں پانچ گرینیڈ حملے اور کم از کم پانچ پولیس اہلکاروں کی الگ الگ واقعات میں ہلاکت شامل ہے۔انہوں نے کہا کہ وہ حزب المجاہدین اور البدر دہشت گرد تنظیموں کا رکن ہے۔پولیس نے مزید کہا کہ متو کی قیادت میں ہونے والے حملوں میں درجنوں پولیس اہلکار زخمی بھی ہوئے ہیں۔ پولیس کے مطابق، متو، پچھلے 13سال سے گرفتاری سے بچنے کیلئے روپوش تھا۔
دلی میں گرفتار حزب ملی ٹینٹ 7دن کی پولیس حراست میں
